د کرکټ نړیوالې شورا لخوا د بنګله دیش په کوربتوب د ۲۰۱۶ م کال نولس کلنو کرکټ نړیوال جام سیالیو مهال ویش او لوبډلویش اعلان کړ.
د اعلان شوي مهال ویش له مخې به افغان نولس کلنه کرکټ ملي لوبډله په (بی) ګروپ کې له پاکستان ، سریلانکا او کاناډا سره په ګروپ کی لوبې ترسره کړي.
دا لومړې ځل دی چې افغان نولس کلنه کرکټ ملي لوبډله د کرکټ په نړیوال جام کې له پاکستان سره په ګروپ کی اعلانیږي.
د بنګله دیش په کوربتوب د ۱۹ کلنو کرکټ نړیوال جام سیالۍ د ۲۰۱۶ م کال جنورۍ میاشتې په ۲۲ مه نیټه پیلیږي او د فیبرورۍ په ۱۴ مه نیټه به د اتلې لوبډلې په اعلان سره پای ته ورسیږي.
دا څلورم ځل دی، چې افغان ۱۹ کلنه کرکټ ملي لوبډله د نولس کلنو کرکټ نړیوال جام سیالیو کې د ګډون حق ترلاسه کوي.
د ورکړل شوي مهالویش له مخې به افغانستان په ۲ تمریني سیالیو کې د جنورۍ په ۲۳ مه نیټه له نیوزیلینډ سره او د همدې میاشتې په ۲۵ مه نیټه له اسټرالیا ۱۹ کلنې کرکټ ملي لوبډلې سره ولوبیږي.
دغه راز افغان نولس کلنه کرکټ ملي لوبډله به د ګروپ رسمي لومړۍ لوبه د جنورۍ په ۲۸ مه نیټه له پاکستان سره ، دویمه لوبه د جنورۍ په ۳۰ مه نیټه له سریلانکا سره او دریمه او وروستۍ د ګروپ لوبه د فیبرورۍ په لومړۍ نیټه له کاناډا نولس کلنې کرکټ ملي لوبډلې ترسره کړي.
د یادونې وړ ده، چې د افغانستان نولس کلنې کرکټ ملي لوبډلې ۳ واړه ګروپي سیالۍ به د بنګله دیش په (سلهیټ) لوبغالي کې د افغانستان په وخت سهار ۷ نیمې بجې ترسره شي.
د سویلی افریقې نولس کلنه کرکټ ملي لوبډله به په ۱۱ م پړاو نولس کلنو کرکټ نړیوال جام سیالیو کې د خپلې تیرې اتلولۍ څخه دفاع کوي.
