بوگون «پنج‌شنبه» کابل‌ده خبری بیر ییغین اوتکزگن جمعیت‌نی رویخط‌گه آلیش اداره باشلیغی همایون محتاط، کاغذی کیم‌لیک‌لر ترقه‌تیلیش کمپاین یکونلنگنیدن خبر بیریب ایتیشیچه، بو کمپاین‌ده 5 میلیون کیشی کاغذی کیم‌لیک قولگه کیریتگن.
محتاط گه کوره، بو کمپاین‌ده ولایت‌لر و تومن‌لرده جمعیت‌نی رویخط‌گه آله‌دیگن 1078 سیار تیم و 441 ثابت مرکز یشاوچیلرگه کاغذی کیم‌لیک ترقه‌تگن‌لر.
اونینگ کوپه‌یتیریشیچه، یالغیز 30 تومنده امنیتی قیین‌چیلیک‌لر باعث، کیم‌لیک ترقه‌تیلمه‌گن.
کاغذی کیم‌لیک ترقه‌تیش کمپاینی، سیلاولر جریانیده یشاوچیلر اشتراکی خصوصیده، زمینه یره‌تیلیشی اوچون یولگه قوییلگن ایدی.
همایون محتاط، کاغذی کیم‌لیک‌لر ترقه‌تیلیش جریانیده ساخته‌کارلیک بولگنینی تَن آلیب ایتیشیچه، اولر تیرگاو اوچون مرکزدن ولایت‌لرگه هیأت یوبارگن و شو تیرگاولر اساسیده، باش قاره‌لاوچیلیک 42 کیشی‌نی ساخته‌کارلیک‌که عیب‌لب قولگه آلگن.
جمعیت‌نی رویخط‌گه آلیش مرکزی اداره‌سی باشلیغی‌نینگ کوپه‌یتیریشیچه، اوشبو اداره‌نینگ دیتابیسی‌ده جمعیت رویخط‌گه آلینگن 25 مینگ کتاب درج ایتیلگن و بو کتاب‌لرده 16.8 میلیون یشاوچی‌نینگ معلوماتی کیریتیلگن.
اونگه کوره، ینگی‌لیک‌ده ترقه‌تیلگن 5 میلیون کیم‌لیک جمله‌سیدن جمعیت رویخط‌گه آلینگن 2 مینگ و 400 کتاب هم دیتابیس گه درج بولگن.
محتاط نینگ کوپه‌یتیریشیچه، سیلاولر ایرکین کمیسیونی کیله‌جک چهارشنبه کوندن باشلب مذکور اداره‌نینگ تصدیق‌لنگن کیم‌لیک‌لرینی دیتابیسی‌دن آواز بیرووچیلرنینگ رویخطی‌دن فیلتر قیلیش اوچون فایده‌لنه آله‌دی.
اوشبو ییغینده سیلاولر ایرکین کمیسیونی باشلیغی گلاجان عبدالبدیع صیاد نینگ ایتیشیچه، مذکور کمیسیون مسؤول اداره‌لرنینگ همکارلیگی‌ده ساخته‌کارلیک و قولابکارلیک خصوصیده، یشاوچیلرنینگ خواطری‌نی رفع قیلیش اوچون سعی و حرکت قیله‌دی و بو کمیسیون یشاوچیلرنینگ خواطرلرینی رفع قیلیش اوچون، دیتابیس‌ده آواز بیرووچیلرنینگ آتی درج ایتیلیشی خصوصیده، 850 ایشلاوچی تعیین قیلگن.
صیادگه کوره، شبهه‌لی استیکری بولگن کیم‌لیک‌لر جمعیت‌نی رویخط‌گه آلگن اداره‌نینگ دیتابیسی بیلن ماسلشتیریله‌دی و استیکر توغری بولمه‌گن صورتده، مذکور کیم‌لیک باطل بولیب و بو جریان یکونلنگنیدن سونگ، آواز بیرووچیلرنینگ سونگی رویخطی اعلان ایتیله‌دی.
عین حالده، قطار سیاسی جریانلر و حزب‌لرنینگ ادعا قیلیشیچه، کاغذی کیم‌لیک‌لر ترقه‌تیلیش کمپاینی جریانیده، کوپینچه ساخته کیم‌لیک‌لر ترقه‌تیلگن.
بونگه قوشیمچه، ییغین جریانیده سیلاولر ایرکین کمیسیونی باشلیغی‌نینگ ایتیشیچه، حاضرگچه یالغیز 3 حزب سیلاولردن نظارت قیلیش اوچون ایشانچ نامه قولگه کیریتگن و باشقه حزب‌لر حاضرگچه ایستمه‌گن.
اوشبو ییغینده امنیتی اداره‌لر سیلاولر جریانیده ساخته‌کارلیک‌لر آلدی آلینیشی توغریسیده سوز بیرگن و شونینگدیک اورغولشیچه، سیلاولر جریانیده ساخته‌کارلیک و قولابکارلیک قیلگن‌لر عدلی و قضایی اداره‌لریگه تاپشیریله‌دی.
