بوگون «چهارشنبه، 1- عقرب» بادغیس ولایتی نینگ جوند تومنی یشاوچیلری، مدنی فعاللری و ولایت کینگشی اعضالریدن بیرقطاری، مذکور ولایتده ناراضیلیک بیر ییغین اوتکزیب و جوند تومنی طالبان تامانیدن اقتصادی قمراوده آلینگنیدن آگاهلنتیرگن.
اولرنینگ ایتیشیچه، بیر ییلدن بویان طالبان گروهی جوند تومنی گه کیلهدیگن یوللردن کوپینچهسیده ماین ییرلشتیرگن و اهالی بو تومن گه ییگولیک ماده آلیب کیله آلمهیدی.
بادغیس ولایت کینگشی اورین باسری عبدالله افضلی نینگ ایتیشیچه، مذکور کینگش گه ییتیشگن گزارشلر اساسیده، حاضرگچه جوند تومنی نینگ 3 یشاوچیسی آذیق-آوقت و دارو یوقلیگی باعث، جان بیرگن.
جناب افضلی نینگ آگاهلنتیریشیچه، جوند تومنیده طالبان نینگ اقتصادی قمراوی سیندیریلمهی و قتناو یوللر امنیتی کوچلر تامانیدن تازهلنمهگن صورتده، مذکور تومنده انسانی فاجعه یوز بیریشی ممکن.
بادغیس مدنی فعاللریدن بیری ناصر عمرزی، جوند تومنیده طالبان نینگ اقتصادی قمراوی دوامیدن خواطر بیلدیریب و بو گروه دن سیاسی مقصدلریگه ایریشیش اوچون تینچ اهالینی قربان قیلمسلرینی سورهگن.
شونینگدیک، جوند یشاوچیلری نینگ ایتیشیچه، مذکور تومن اهالیسیدن کوپینچهسی نینگ ییماق اوچون بیر لقمه نانی یوق و اهالی یوللرده ییرلشتیریلگن ماینلردن قورقیب بو تومندن چیقه آلمهیدی.
جوند یشاوچیلری بیر شرطنامه صادر قیلیب حکومت، بیرلشگن ملتلر تشکیلاتی و انسان دوستلیک ادارهلریدن تیزلیککه مذکور تومن اهالیسی نینگ وضعیتی گه دقت قیلیشلرینی سورهگن.
بادغیس حاکمی نینگ سوزلاوچیسی نجمالدین برهانی، جوند تومنی طالبان تامانیدن اقتصادی قمراوگه آلینگنینی تصدیقلب ایتیشیچه، اوشبو تومن اهالیسی دن کوپینچهسی اویلرنی ترک قیلیشگن و حاضر مذکور تومنده چمهسی 500 عایله حیات کیچیرهدی.
بادغیس حاکمی سوزلاوچیسی نینگ ایتیشیچه، یاردم ییتکزووچی ادارهلرنینگ همکارلیگی بیلن هوا یولیدن جوند گه ییگولیک ماده انتقال بیریش اوچون سعی و حرکت قیلهدیلر.
بادغیس ولایتی نینگ جوند تومنی، اوشبو ولایت مرکزی قلعهنو شهری نینگ 160 کیلومترلیگیده جایلشگن و بو تومنده طالبان گروهی کینگ شکلده فعالیت قیلهدی.
شو توغریده…
بادغیس مدنی جماعهچیلیک مسئوللری: ولایت حاکمی ظرفیتسیز دیر
