مجلس بیرینچی اورین باسری ظاهر قدیرنینگ بیانات‌لری، مجلس اعضالریدن بیرقطاری‌نینگ قرشی‌لیگی‌گه روپه‌ره بولدی. قرشی‌لیک‌لرگه قوشیمچه، مجلس باشلیغی عبدالرؤوف ابراهیمی، ظاهر قدیردن اوز بیانات‌لرینی اثباتلش اوچون، مجلس‌گه ییترلیچه حجت ارایه ایتیشینی سوره‌دی. شونینگ‌دیک مجلس باشلیغی، بوگونکی عمومی ییغینده، جناب قدیرنینگ ارایه ایتگن بیانات‌لری و حجت‌لری تیکشیریلیشی خصوصیده، کمیسیون تشکیل ایتیلیشینی سوره‌دی.
مجلس بیرینچی اورین باسری، اوتگن هفته (دوشنبه کون) سوزلری جریانیده، مملکت امنیت کینگشی و برچه امنیتی رسمی‌لر داعش گروهی‌دن حمایت قیلیشینی ایتدی. شونینگ‌دیک جناب قدیرنینگ ایتیشیچه، داعش گروهی باشلیغ‌لری پایتخت‌ده حیات کیچیره‌دی و هردایم دولت بلند مرتبه‌لی رسمی‌لری بیلن اوچره‌شیب و بحث اوتکزه‌دی.
مجلس اعضالری، جناب قدیرنینگ سونگی بیانات‌لرینی دشمن مقصدی و هدفی‌گه همراه بیلیب و ایتیشیچه، خلق آوازی بیلن ملت اویی‌گه کیلگن کیشی‌لر، خلق خواطریگه سبب بولمس‌لیگی کیره‌ک. مجلس اعضاسی هیلی ارشادنینگ ایتیشیچه، پارلمان بیرینچی اورین باسری‌نینگ بیانات‌لری امنیتی کوچلر خصوصیده، تشقی یاردم‌لر کمه‌ییشی‌گه سبب بوله‌دی. اونینگ ایتیشیچه، بونده‌ی بیانات‌لر برچه‌نینگ فکرینی سوراققه دوچ کیلتیره‌دی.
شونینگ‌دیک مجلس اعضالریدن باشقه بیری شینکی کروخیل‌نینگ ایتیشیچه، ظاهر قدیرنینگ، حجت‌لری و بیانات‌لری تیکشیریلیشی اوچون میدیالردن اوزاق یاشیرین کمیسیون ایجاد ایتیلیشی کیره‌ک.
بیراق قطار کیشی‌لر، ظاهر قدیرنینگ بیانات‌لرینی، ملی امنیت کینگشی‌نینگ مصلحتچیسی حنیف اتمر بیلن بولگن شخصی قیین‌چیلیگی دیب بیله‌دی. اولرنینگ ایتیشیچه، شخصی و سمتی قیین‌چیلیک‌لر ملی مسئله‌لرگه کیریتیلمس‌لیگی لازم.
عین حالده، جناب قدیر، مذکور نماینده‌لرنینگ ادعالرینی رد ایتیب و اولرنی هم ملی امنیت کینگشی‌گه همکارلیک قیلیش‌گه عیب‌له‌دی. جناب قدیرنینگ ایتیشیچه، ادعالرینی اثباتلش خصوصیده، ییترلیچه حجت قولگه کیریتگن و بو مسئله‌نی اثباتله آلمه‌گن صورتده، وظیفه‌سیدن وازکیچه‌دی.
اساسی قانون‌نی تیکشیریش کمیسیونی‌نینگ اعضاسی تانیشتیریلدی
شونینگ‌دیک بوگون مجلس عمومی ییغینیده، اساسی قانون‌نی تیکشیریش کمیسیونی‌نینگ اعضالریدن 6 ته‌سی تصدیق آواز آلیش اوچون تانیشتیریلدی. جمهور رییس ایکینچی اورین باسری سرور دانش، غزال عارف، داکتر محمدقاسم هاشمزی، عبدالله شفاهی، داکتر ابوبکر تقی، عبدالرؤوف هروی و قاضی محمدعارف حافظ نی، مذکور کمیسیون اعضاسی اوچون نماینده‌لر کینگشی‌گه تانیشتیردی. شونینگ‌دیک، عبدالحسیب احدی باش محکمه کینگشی اعضاسی اوچون، ایشانچ آواز آلیش خصوصیده، مجلس‌گه تانیشتیریلدی.
اساسی قانون‌نی تیکشیریش کمیسیونی 7 عضودن تشکیل ایتیلیب و تورت ییل‌گچه بو وظیفه‌گه تعیین ایتیله‌دی. قانون اساسیده، اساسی قانون‌نی تیکشیریش کمیسیونی‌نینگ اعضاسی، جمهور رییس تامانیدن تانیشتیریلیب و نماینده‌لر کینگشی تامانیدن تصدیق‌لنگنی‌دن کیین، فعالیت‌لرینی باشله‌یدی.
