افغانستان نماینده‌لر مجلسی، جمهور رییس مجلس نینگ قراریگه اعتبار بیرمه‌یدی دیدیلر. جمهور رییس نینگ کوپینچه قراری قانونگه ضد دیگن مجلس اعضالری.
مجلس نینگ باشلیغی عبدالرووف ابراهیمی، بولر هنوزگچه 4 مصوبه و 12 قانون لایحه‌سینی تصدیق ایتگن‌لیکلرینی ایته‌دی. لیکن، جمهور رییس هلیگیچه هم بو مصوبه و قانونلرنی تصدیق ایتمه‌گن و تصدیق ایتگن بولسه هم تطبیق ایتمه‌گن دیدی ابراهیمی.
جناب ابراهیمی، مجلس کابینه وزیرلریدن ییتی کیشی نینگ صلاحیتینی آلگن؛ بیراق حکومت قانونگه قرشی اولرنی هنوز هم سرپرست صفتیده سقلب قویگن دیگن. شونینگدیک ایش‌دن آلینگن وزیرلر اورنیگه ینگی نامزدلر تانیشتیرمه‌گن.
دولت اداره‌لریده‌گی ترتیب سیزلیک بعضی وزیرلیکلرنینگ ایریم بولیملری باشقه وزیرلیککه آلیب باریلیشی و نماینده‌لر تامانیدن تصدیق بولگن بودجه گه اعتبار بیریلمسلیک پارلمان باشلیغی نینگ اساسی شکایتلریدن حسابلنه‌دی.
ابراهیمی حکومت بو موردلرگه اعتبار قره‌تمه‌گن حالده، مجلس جدی قرارلر قبول قیلیشی ممکن دیگن.
امنیت‌گه اصلاحات کیریتیش و توریسم ایشلری بوییچه وزیرلیک ایجاد بولگنی حقیده اشاره قیلگن ابراهیمی، حکومت ینگی اداره آچمس‌دن آلدین ملی مجلس بیلن مصلحت قیلیشی کیره‌ک لیگینی ایته‌دی.
نماینده‌لر مجلسی نینگ بیر قطاری بو توغریده جواب بیریش مقصدیده جمهور رییس پارلمان‌گه چقیریلیشی‌نی اوستیده تاکید قیلگنلر.
اما، کمال ناصر اصولی، حکومت نینگ اعتبارینی جلب قیش نیتده نیچه وقت مجلس نینگ ایشیگی یاپیلیشی ضرور دیدی. جناب اصولی بو ایش هم نتیجه آلیب کیلمه‌گن حالده، ملی اجماع تشکیل بیریلیشی مقصدگه موافق دیگن.
