لویې څارنوالۍ له ۱۵۰۰ ډېرې د اداري فساد اړوند دوسیې څېړلي

لویه څارنوالي وايي، د ۱۳۹۶ لمریز کال په ترڅ کې یې د اداري فساد ۱۵۲۶ دوسیې څېړلي دي.

د لویې څارنوالۍ ویاند جمشید رسولي کابل کې خبري غونډې ته وویل د دغو دوسیو په اړه ۵۴ ملکي او پوځي مامورین ممنوع الخروج او یا یې هم دندې ځنډول شوې دي.

د لویې څارنوالۍ ویاند جمشید رسولي دا هم وویل چې محکمو د بېلابېلو جرمنو له امله  ۱۱۸ کسان محاکمه کړي، ۹۴ کسانو ته یې سزا ورکړل شوې او یوشمېر نور یې نغدي جریمه شوي دي.   

ښاغلي رسولي ټینګار وکړ، د اداري فساد پروړاندې د دولت حوصله پای ته رسېدلې، زیاته یې کړه، د اداري فساد په قضیو کې ښکېل کسان، چې په هر دریځ او ځای کې وي قانون به پرې پلی کېږي.

لویه څارنوالي په داسې حال کې د دومره شمېر دوسیو د څېړنې خبره کوي چې تراوسه د اداري فساد سترې دوسیې لکه د کابلبانک په څېر لا هم نه دي څېړل شوي.

د افغانستان روڼتیا څار بنسټ د تېرې اوونۍ په پای کې اعلان وکړ چې افغانستان په روان کال کې د نړۍ د فاسدو هېوادونو په کتار کې څلور ګامه صعود کړی دی.