له ښځو د ملاتړ لپاره د نیاوغوښتنې ډلې غړیو نن په کابل کې د یوې خبري غونډې پرمهال د افغان دولت د کابینې پر هغې پرېکړې اعتراض وکړ چې کابينه وايي، د نجونو د پېغلتوب یا بکارت پردې معاینه کول د نجلۍ د رضایت او باصلاحیته محکمې له حکم پرته جایز نه دي.
اوس ياده ډله وايي چې د نجونو د پېغلتوب معلومولو معاینات باید هېڅ ونه شي.
دغه ډله غواړي چې هغو کسانو ته باید سزا ورکړل شي چې د پېغلتوب ثابتولو د معایناتو غوښتنه کوي.
د افغانستان میډیکای موسسې رییسه جمیله افغاني وايي، د بکارت پردې د معاینه کولو پر بنسټ د کابینې پرېکړه چې د نجلۍ په رضایت د صلاحیت لرونکې محکمې په حکم پورې تړل شوې، پر بشري حقونو یو ډول بې باوري ده.
د افغانستان د جزا کوډ د ۶۴۰مې مادې په دویمه فقره کې ویل شوي چې د نجونو د پېغلتوب یا بکارت پردې د طبي معایناتو ترسره کول د نجلۍ له رضایت او د صلاحیت لرونکې محکمې له حکم پرته منع دي.
د افغانستان د مدافع وکیلانو خپلواکې ټولنې مرستیاله نجلا راحل وايي، د جرم او زنا عمل د ثابتولو او دغه راز د ښځو د جنسي وضعیت ټاکلو په موخه د بکارت پردې معاینه کول باید په جدي توګه له هېڅ راز قید او شرط پرته منع شي.
له ښځو د ملاتړ لپاره د نیاوغوښتنې ډلې غړی محمد اشرف بختیاري او د عدلي علومو خدماتي موسسې مدیر وايي، عدلي او قضايي بنسټونه باید د دې پرځای چې عدالت رعایت کړي، د قضیو علمي او حقوقي معیارونه تر پښو لاندې کوي.
له دې وړاندې د افغانستان د بشري حقونو خپلواک کمیسیون هم د جزا کوډ د ۶۴۰مې مادې د دویمې فقرې د تعدیل په غبرګون کې، د بکارت پردې له قید او شرط پرته منع کېدو غوښتنه کړې وه.
هڅه مو وکړه په دې اړه د عدلیې وزارت نظر هم ولرو، خو له پرلهپسې هڅو سربېره بریالي نه شوو.
