له وسله‌والو ډلو د اېران ملاتړ؛ طالبانو رد کړه

امریکا تېره ورځ د یوشمېر وسلو په ښودلو سره اعلان وکړ چې د اېران حکومت په دغو وسلو په یمن کې د حوثیانو او افغانستان کې د طالبانو ملاتړ کوي.

د اېران په چارو کې د امریکا ځانګړي استازي برایان هوک وویل، دغه نظامي تجهیزات چې هاوان او بې‌پېلوټه الوتکې په‌کې دي، د یمن باري کښتیو او ځینې نور یې هم د سعودي عربستان د نظامیانو له لوري ترلاسه شوي دي.

د امریکايي چارواکیو په وینا، پر دغو وسلو او تجهیزاتو شته نښې او لیکل ښيي چې په اېران پورې اړه لري.

خو طالبانو نن په یوه خبرپاڼه کې ویلي چې د هېڅ هېواد له لوري یې ملاتړ نه کېږي.

دغه ډله د امریکا دا ډول اقدامات «د افغانستان په جګړې کې د خپلې ماتې پټولو» له‌پاره بولي.