اجرایه ریاست د دغه مطلب په څرګندولو سره ویلي، چې وروسته له دې پاکستان ته د افغان حکومت او طالبانو تر منځ د سولې په اړه په خبرو اترو کې د منځګړيتوب اړتیا نه شته.
د اجرایه ریاست مرستیال ویاند جاوید فیصل تېره ورځ د (اګست په ۳۱مه) له رسنیو سره په خبرو کې وویل، که چېرې د سولې بهیر له سره پيلېږي؛ نو پرته د پاکستان له منځګړیتوبه به مخې ته ځي.
د اجرایه ریاست د مرستیال ویاند پر خبره، که چېرې اسلام اباد د کابل وړاندیزونو ته احترام ونه کړي او د کابل انتظار رالنډ نه کړي؛ نو له پاکستان سره به پر اړیکو له سره غور وکړي.
په ورته وخت کې د طالباني مسایلو شنونکی وحید مژده له سلام وطندار سره په خبرو کې وویل، تر هغه چې د ولسمشر او اجرایه رییس تر منځ ستونزې نه وي هوارې شوي؛ د سولې په اړه خبرې اترې نتیجه نه لري.
د مژده په خبره یواځينۍ لاره چې افغانستان کولی شي د پاکستان له مداخلې پرته له طالبانو سره خبرې وکړي دا ده، چې یوه مناسبه تګلاره جوړه کړي.
وحید مژده زیاتوي، چې پاکستان تر اوسه د سولې په اړه افغانستان ته دوکه ورکړې ده او تل یې د خپلې خوښې کسان له افغاني لوریو سره خبرو ته کېنولي دي.
دا څرګندونې په داسې حال کیږي، چې د (جولای په ۷مه) د پاکستان په مري ښار کې د افغان دولت او طالبانو استازو ترمنځ د لومړي ځل له پاره ۴ ساعته خبرې اترې وشوې، چې د امریکا او چین استازو هم د څارونکو په توګه برخه په کې اخیستې وه.
خو دغه خبرې اترې د طالبانو د پخواني مشر ملاعمر له مړینې وروسته وځنډېدلې.
د ملاعمر مړینې او په کابل کې د امنیو وروسیتو پېښو د دې لامل شول، چې افغان حکومت د پاکستان پر وړاندې خپل موقف ته تغیر ورکړ او له پاکستانه یې وغوښتل چې د ترهګرو پر وړاندې جدي مبارزه وکړي او هغوی ته په خپله خاوره کې پناه ځایونه په نښه کړي.
