د هلمند ولایت چارواکي وايي چې د ولسي جرګې نوماند عبدالجبار قهرمان د ټاکنیز دفتر په څوکۍ کې ځای پرځای شويو چاودېدونکيو چاودنه کړېده.
د هلمند د والي ویاند عمر ځواک سلام وطندار ته وویل چې د ښاغلي قهرمان په ګډون ۸ تنه ټپیان شويدي.
دا پېښه نن سهار ۹ نیمې بجې پېښه شوې.
ښاغلی ځواک د ولسي جرګې د دې نوماند روغتیايي وضعیت وخیم بولي.
خو د پېښې عیني شاهدان وايي چې پهدې چاودنه کې د جبار قهرمان په ګډون ۳ تنه وژل شوي او ۸ تنه نور ټپيان شويدي.
امنیتي سرچینو تر اوسه پهدې اړه څه نهدي ویلي.
ولسمشر محمداشرف غنی د دې تروریستی برید د غندنې پرمهال وویل، شهید قهرمان د افغانستان صادق او زړور بچی و چې تل یې د هېواد د ابادۍ او د ولس د سوکالۍ ملی فکر او نه ستړې کېدونکې هڅې کولې. تروریستان او د دوی ملاتړی د وحشیانه بریدونو په ترسره کولو سره د ټاکنو په سولهییز، ملي او ولسواک بهیر زموږ د خلکو باور نهشي کمزوری کولی.
ولسمشر مسوولانو ته د شهید عبدالجبار قهرمان د ټاکنیز کمپاین په دفتر کې د رامنځته شوې پېښې د هر اړخیزې څېړنې، د عاملینو د مجازات او د ټاکنیزو کمپاینونو د غونډو د لا ښه امنیت لارښوونه وکړه.
طالب ویاند ذبیحالله مجاهد رسنیو ته د یوې خبرپاڼې له لارې د جبار قهرمان وژل د دوی کار وګڼلو.
ښاغلی قهرمان د ولسي جرګې غړی، په نظامي چارو کې د ولسمشر مشاور، د هلمند ولایت د امنیتي حالاتو د کابو کولو لهپاره ځانګړی قوماندان او اوس د ولسي جرګې بیاځلي ټاکنو ته خپلواک نوماند و.
