د صنعت او سوداګرۍ وزارت سرپرست اجمل احمدي نن د شنبې په ورځ پر خپله ټوېټر پاڼه لکلي چې تر دې وروسته به د تورخم لار اوونۍ کې شپږ ورځې په ۲۴ ساعته ډول پرانیستې وي او د سپینبولدک-چمن لار به هم اوونۍ کې شپږ ورځې؛ خو د کاري ساعتونو په زیاتېدو سره پرانیستل شي.
احمدي وايي، د افغانستان له لوري صادرات له کوچني اختر وروسته دغو دوو لارو پیلېږي.
د صنعت او سوداګرۍ وزیر لیکلي چې د صادراتو او وارداتو لپاره، ټرانزیټي لارو نه د اسانه کارونې په موخه به سوداګرو ته اړین سهولتونه په واک کې ورکړي.
د تورخم او سپینبولدک لارې د کورونا ويروس په پراخېدو سره د مسافرو پرمخ تړل شوي.
په ورته وخت کې د ننګرهار د والي ویاند عطالله خوږیاڼی وايي، د تورخم لار نن سهار اته بجې کوزه پښتونخوا کې د بند پاتې مسافرو د را ستنيدو پرمخ یو طرفه پرانيستل شوې ده.
هغه وایي، راستنیدونکو مسافر لپاره یې بشپړ روغتیایي تدابیر نیولي او اټکل کېږي چې نن ورځ به شاوخوا پنځه زره افغانان د تورخم له لارې هېواد ته راستانه شي.
اسلاماباد کې افغان سفير عاطف مشعل هم ویلي، د لارې بیا پرانیستل به ستونزمن وي، نو ټول هغه کسان چې پاکستان کې بند پاتي او غواړي هېواد ته ستانه شي، نو نن دې تورخم ته ځان ورسوي.
د تورخم او سپینبولدک دروازې د کورونا وېروس د خپرېدو له وېرې د مسافرو پرمخ تړل شوي.
