پرون (جمعه) د هرات ښاري امریت څلور لارې کې یو لوی سوداګریز مرکز اور واخېست. د ځايي چارواکیو په وینا، پهدې ودانۍ کې د کابلبانک تر ټولو غټه څانګه هم وه چې ډېرې برخې یې سوځېدلې دي.
د هرات د والي ویاند جیلاني فرهاد وايي، د دې اورلګېدنې په پایله کې بانک ته میلیونونه افغانۍ مالي زیان اوښتی او د مالي زیان کچې د پيدا کولو او د پېښې د رامنځته کېدو لامل د څېړلو لهپاره یې یو پلاوی ګومارلی دی.
دغه اتهپوړیزې ودانۍ کې ـ چې پرون یې زیاتره برخې وسوځېدې ـ د نوي کابلبانک دفتر په ګډون ځېنې علمي او ښوونیز مرکزونه او هټي هم فعالیت لري.
هرات کې د نوي کابلبانک ولایتي دفتر مشر عبدالرحیم شفق سلاموطندار ته وویل چې د اورلګېدنې په نتیجه کې نغدو پیسو او د دې بانک معتبرو سندونو ته زیان نهدی اوښتی؛ خو د بانک سیستمونو او ای ټي برخه ډېره زیانمنه شوېده.
هغه د ستنډرډ ایمني سیستم نهشتوالی د اورلګېدلو او دوامداره پاتې کېدل د زیات زیان اصلي لامل بولي.
د دې ودانۍ د ښکتنۍ برخې هټیوال او ځېنې مدني فعالان هم دې ودانۍ کې د ایمني سیستم نهشتوالی د اور لګېدلو اصلي لامل بولي او وايي، د اور لګېدلو او نورو پېښو پر وړاندې د ډېرو لوړپوړیزو ودانیو ایمني سیستم کمزوری دی.
د هرات اوسېدونکي له ځايي ادارې او ښارجوړونې ریاست نه غواړي چې د ودانیو ستنډرډ برخې ته جدي پام وکړي.
