کابل کې د تېرو دوو ورځو لاریونونو له کبله د ښار د واټونو ترڅنګ، د پولیسو پوستې او ځینې رېنجر هم وېجاړ شوي وو. اوس لاریونوال وايي چې هغه سیمې به بېرته پاکې او ورغوي چې د لاریون پرمهال سوځول شوې یا هم چټلې شوې دي.
د دغه کمپاین ګډونوال امیر عظیمي او اسد پارسا چې په همدې موخه راوتلي وايي، د لاریون پرمهال یې یوشمېر پوستې سوځولي، دېوالونه یې راغورځولي او رنګونه یې هم ور خراب کړي، خو اوس یې خښتې، رېګ او د رغاونې وسایل ورته راوړي چې بېرته یې ورغوي.
دوی وايي، لګښت یې معترضان او د کابل یوشمېر ښاریان ورکوي او هغه کثافات به هم له سړکونو راټول کړي چې په تېرو دوو ورځو کې پرې غورځېدلي وو او د ښار رنګ یې بدل کړی دی.
په همدې حال کې د کورنیو چارو وزارت د ویاند مرستیال نصرت رحیمي د معترضانو دغه کار ستايي او وايي، هر ډول ښه ګام چې د خلکو له لوري اخیستل کېږي، ستایو یې.
په کابل کې د تېرو دوو ورځو لاریون پرمهال شاوخوا ۶ پوستې سوځول شوي او د راپورونو له مخې ۴۸ امینتي ځواکونه هم پهکې ټپیان شوي دي.
