د ختیځ نورستان په واما ولسوالۍ کې د دې سیمې زیات شمېر قهرېدلو ولسي وګړو د واما ولسوالۍ پر ودانۍ ډله ییز چپاو وروړي او له ولسوالۍ یې هغه هلک او جلۍ په زور اېستلي او وروسته یې وژلي، چې پرون ورځ له کوره د تښتې پر مهال پولیسو نیولي وو.
د نورستان سرپرست والي حافظ عبدالقیوم د پېښې پخلي تر څنګ وايي، ګڼ شمېر ولسي کسانو نن ورځ د واما ولسوالۍ د دروازې له ماتولو وروسته دغه هلک او جلۍ په زور له ولسوالۍ اېستلي او وروسته یې وژلي دي.
هغه وايي، د ولسوالۍ پولیسو د خلکو تیت پرک کولو په موخه هوايي ډزې هم کړي، خو د هغوی د شمېر د زیادښت له امله پولیس د هلک او جلۍ په خلاصون نه دي بریالي شوي.
حافظ عبدالقیوم زیاتوي، ولسي وګړو هم پر پولیسو ډزې کړي، چې له امله یې درې پولیس ټپيان شوي او د یو پولیس سرتېري روغتیايي حالت د ډاډ وړ نه دی.
د والي په خبره، واما ولسوالۍ ته یې د پېښې څېړلو له پاره پلاوی ورلېږلی دی.
بل پلو د نورستان د ښځو چارو رییسه ذاهده فیضان وايي، په دغو قهرېدلو خلکو کې ډېره برخه د جلۍ د پلارګنۍ او خسرګنۍ وه.
مېرمن فیضان وايي، شاوخوا دوه اوونۍ مخکې د وژل شوې جلۍ واده له یو بل سړي سره شوی و، چې تېره ورځ یې له یو بل هلک سره له کوره تښتېدلې وه.
نوموړې وايي، د دغې پېښې د حل په موخه په ولسي کچه هڅې پیل شوې وې، چې له هواري مخکې ولسي وګړو پر ولسوالۍ یرغل وکړ او د ولسوالۍ ودانۍ د دروازې له ماتولو وروسته یې دواړه وژلي دي.
د نورستان د ښځو چارو ریاست د معلوماتو له مخې په روان کال کې دې ولایت کې له ښځو سره د کورني تاوتریخوالي ۵۶ پېښې ثبت شوي دي او زیاتوي، چې دغه پېښه په خپل ډول کې لومړنۍ ده.
