بغلانی‌لیک بیر 70 یاشر کیکسیگن کیشی 156 مرته یره‌لنگن و کسل بولگن امنیتی کوچلرگه قان ساوغه قیلگن و حاضرهم قندوز و بغلان‌ده یوزبیرگن سونگی توقنه‌شوولرده یره لنگن امنیتی کوچلرگه قان بیریش‌گه تیارگرلیک کورستکن.
اوشبو کیکسیگن کیشی‌گه کوره، هر بیر مرته 500 سی‌سی قان بیرگن.
اوشبو حاجی سلطان محمد ناملی کیشی، بغلان ولایتی قوم بویوک‌لریدن بیری دیر. اونینگ ایتیشیچه، هر بیر شرایط‌ده امنیتی کوچلر یانیده توریب و سونگی نفسی‌گچه اولردن حمایت قیله‌دی.
سلطان محمدنینگ ایتیشیچه، بو گون (چهارشنبه) مذکور ولایت یشاوچی‌لریدن 100 ته‌سی بیلن بیرگه کیلیب قندوز و بغلان اوروشی‌ده یره‌لنگن‌لرنی قوتقریش خصوصیده، قان ساوغه قیله‌دی. اونگه کوره، لازم بولگن صورتده، امنیتی کوچلردن حمایت ایتیش اوچون باشقه یوز مرته قان بیره‌دی.
شونینگ‌دیک اوشبو کیکسیگن کیشی‌نینگ ایتیشیچه، قان بیریب کسل‌لر جانی‌نینگ قوتقرگنی‌دن، فخرلنه‌دی.
بغلان ولایت کسلخانه‌سی قان بانکی مسؤولی داکتر حبیب‌الله فرملی، سلطان محمد سوزلرینی تأییدقیلیب ایتیشیچه، بوگون مذکور ولایت یشاوچی‌لریدن یوزدن آشه‌راغی امنیتی کوچلردن حمایت ایتیش خصوصیده، قندوز و بغلان‌ده یوزبیرگن سونگی واقعه‌لرگه یره‌لنگن‌لر اوچون قان ساوغه قیلگن‌لر.
جناب فرملی‌گه کوره، یره‌لنگن امنیتی کوچلرگه قان بیریش، اولرگه قیته‌دن جان بیریش دیر و بولایحه دوام ایتکن صورتده، امنیتی کوچلرگه روحیه بیره‌دی.
اونگه کوره، بغلان ولایتی ساغلیک ریاستی، قندوز و بغلان اوروش‌لریده یره‌لنگن‌لر اوچون قان بیریش‌لرینی سوره‌گن و بو ایستک مذکور ولایت یشاوچیلری تامانیدن خوش قرشی‌لنگن.
ایتیلیشیچه، قندوز اوروشی‌ده یره‌لنگن‌لردن اونلرچه‌سی توقنه‌شوولر شدت‌لنگنی و مذکور ولایت‌ده چیگره بیلمس داکترلر کسلخانه‌سی اوستیگه هوایی هجوم اویوشتیریلگنی‌دن کیین، دارولش اوچون بغلان مرکزی کسلخانه‌سی‌گه آلیب کیلینگن. اوشبو کسلخانه رسمی‌لریگه کوره، حاضرگچه 80 دن آشه‌راق یره‌لنگن کیشی، اوشبو کسلخانه‌ده دارولنگن.
طالب‌لر اوتکن هفته قندوز شهری اوستیگه هجوم اویوشتیریب و اوشبو ولایت اداره‌سینی اوچ کونگچه قولگه آلگن. افغانستان امنیتی کوچلری اوچ کوندن کیین، مذکور شهر اداره‌سینی قیته‌دن قولگه آلدی؛ بیراق ایتیلیشیچه، حاضرگه قدر اوشبو شهرده توقنه‌شوو دوام ایتماقده.
دیمک اوشبو واقعه تلفاتی توغری‌سیده دقیق رقم قولگه کیریتیلمه‌گن، بیراق ایتیلیشیچه، اوشبو توقنه‌شوولرده کوپینچه تینچ‌اهالی اولیب و یره‌لنگن.
باشقه تاماندن، بغلان ولایتی قیزیل آی جمعیتی دفتری‌نینگ ایتیشیچه، مذکور ولایت‌ده اوتکن تورت آی‌ده امنیتی کوچلر بیلن طالب‌لر اورته‌سیده یوزبیرگن توقنه‌شوولر نتیجه‌سیده، 50 تینچ‌اهالی هلاک بولگن و باشقه 110 دن آرتیق کیشی یره‌لنگن. اولرگه کوره، بونگه قوشیمچه، 300 اولتیریش اوی بوزیلگن.
بغلان ولایتی قیزیل آی دفتری باشلیغی داکتر حامد نیازی، سلام‌وطندار بیلن اوتکزگن خاص صحبتیده ایتیشیچه، بغلان ولایتی‌ده تینچ‌اهالی تلفاتی‌گه طالبان گروهی سبب بولگن. جناب نیازی، اوروشچین تامان‌لریدن تینچ‌اهالینی هدف آستی‌گه آلمس‌لیک‌لرینی سوره‌دی.
