قندوز ولایتی مملکت ناتینچ و زیان کورهدیگن ولایتلر جملهسیدن دیر، بیراق بیرقطار فعال عیاللر نیازمند و کمبغل عیاللرگه ایش زمینهسی یرهتیش اوچون سعی و حرکت قیلهدیلر.
ینگیلیکده قندوز ولایتی بوییچه عیاللر انسجام کینگشی، «تعاون» دفتری نینگ مالی یاردمی بیلن اوشبو ولایتده بولگن نیازمند عیاللر اوچون ترشی و مربا ایشلب چیقارهدیگن بیر ایشخانه ایجاد قیلگن.
مذکور ایشخانهده فعالیت قیلهدیگن عیاللر تامانیدن ایشلب چیقاریلگن ترشی و مربالر بازارده ساتیلهدی.
اوشبو ایشخانه ایشلاوچیلریدن بیری زربیبی تورموش اورتاغی (اِیری) نی اوروشلر جریانیده قولدن بیرگن و حاضرده 4 بالهدن سرپرستلیک قیلهدی. اونینگ ایتیشیچه، بو ایشخانهگه ایشلش بیلن بالهلریگه نفقه تیارلب و اقتصادی نقطهنظردن بولگن قیینچیلیگینی حل قیلهدی.
قندوز فعال عیاللریدن بیری هاجره اسلمبیک، مذکور ایشخانه نینگ ایجاد ایتیلیشینی نیازمند عیاللر اوچون اونملی عنوان قیلهدی. اونینگ ایتیشیچه، اوشبو عیاللر بو ایشخانهگه ایشلش بیلن کوندهلیک خرجتلرینی تامین قیلهدی.
خانم اسلمبیک، قندوز یشاوچیلریدن نیازمند عیاللردن حمایت قیلیش اوچون مذکور ایشخانهده ایشلب چیقاریلگن محصولاتلردن قولهنیشلرینی سورهیدی.
عینحالده، قندوز ولایتی بوییچه عیاللر انسجام کینگشی مسوولی و مذکور ایشخانه اساسچیسی ناهید قریشی نینگ ایتیشیچه، حاضرده 5 نیازمند عیال اوشبو ایشخانهده شغللنهدی.
خانم قریشی نینگ ایتیشیچه، کیلهجکلرده نیازمند عیاللرگه شغل ایجاد قیلیش اوچون سعی و حرکت قیلهدی. او حکومتدن عیاللرنینگ تولیداتلریدن حمایت قیلیش اوچون اولرگه یاردم بیریشینی سورهیدی.
قندوز ولایتیده دواملی اوروشلر باعث، کوپ قطار عیاللر تورموش اورتاغی (اِیری) لرینی قولدن بیریب و بالهلریدن سرپرستلیک قیلهدی. شوندهی بیرشرایط ده مذکور ایشخانه نینگ ایجاد ایتیلیشی نازمند عیاللردن حمایت قیلیش اوچون اونملی دیر.
