قندوز ده کرونا کسل‌لریگه خاص بیر کسلخانه ایشلاوچی‌لریدن قطاری نینگ ایتیش‌لریچه، بو کسلخانه نینگ کمیده یوز ایشلاوچیسی نی ایشدن آلینیشی گه قرار قیلینگن. اولرنینگ ایتیش‌لریچه ساغلیک وزیرلیگی بو کسلخانه نینگ ایش‌لرینی «جک» دفتری گه تاپشیرگن ایدی و حاضر بو دفتر ساغلیک وزیرلیگی بیلن بیرگه مذکور کسلخانه نینگ 162 ایشلاوچیسی‌دن کمیده یوز ایشلاوچیسی نی ایشدن چیکلنتیریش گه قرار قیلگن.
اوشبو کسلخانه نینگ نرس‌لریدن بیری عین‌الله گه کوره، بو کسلخانه مسئوللری اولر بیلن 3 آیلیک شرطنامه امضاله‌گن ایکن و حقوق‌لرینی آلمه‌سدن آلدین ایش‌لریدن چیکلنتیریلگن.
مذکور کسلخانه نینگ ایشلاوچی‌لریدن باشقه بیری لیدا امیری نینگ ایتیشیچه، شرطنامه یکونلنمه‌سیدن آلدین ایشدن چیکلنتیریش‌لریمیز حقیده قرار قیلینگن حالده، بیزلر خبردار بولیشیمیز کیره‌ک ایدی. اونگه کوره، واسطه یا-ده پولی بولگن کیشی بو کسلخانه‌ده ایشله‌یدی.
قندوز ولایتی کینگش اعضاسی امرالدین نینگ ایتیشیچه، بو موضوع حقیده جک دفتری بیلن صحبت اوتکزیش‌لری ممکن.
قندوز ولایتی بوییچه جک دفتری مسئوللری بو توغریده سوزلش اوچون حاضر بولمه‌گن. بیراق قندوز ساغلیک ریاستی باشلیغی احسان‌الله فضلی نینگ ایتیشیچه، اوشبو کسلخانه نینگ ایشی جک دفتری گه تاپشیریلگنیدن خبرسیز دیر.
مملکتده کرونا ویروسی نینگ بیرینچی ایجابی واقعه‌سی قید ایتیلگنیدن بویان قندوز ولایتیده 73 کیشی بو ویروس گه چلینگن کیم بولردن 3 ته‌سی جان بیرگن.
