تخار ولایت رسمی‌لری‌نینگ ایتیشیچه، مذکور ولایت‌ده باش پناه ایزلب کیلگن قندوز بدرغه‌لری‌نینگ باله‌لریدن بیرقطاری، آچلیک‌دن هلاک بولگن.
قندوز شهری اوستیگه طالب‌لر تامانیدن اویوشتیریلگن بیرینچی هجوم‌دن کمیده ایکی هفته اوتیب باره‌یاتیب‌دی و بو اوروش نتیجه‌سیده‌گی قیغو و الم‌لر کونسایین کوپیماقده.
تخار ولایتی‌نینگ سرپرستی عبدالطیف ابراهیمی سلام‌وطندار بیلن اوتکزگن صحبتیده، قندوز بدرغه‌لریدن کوپینچه‌سی مذکور ولایت‌گه کیلگنی‌دن خبر بیره‌دی. اونگه کوره، اوشبو بدرغه‌لرگه تیزلیک‌ده یاردم ییتکیزیلمه‌گن صورتده، انسانی مصیبت یوزبیریشی ممکن.
تخار ولایتی سرپرستی‌نینگ ایتیشیچه، محلی حکومت بدرغه‌لر رویخط‌گه آلینیشی اوچون کمیته تشکیل ایتکن و دستلبکی تیکشیروولرنی کورستیشیچه، حاضرگه‌قدر قندوز بدرغه‌لریدن 7 مینگ‌دن آشه‌راغی تخار ولایتی‌گه باش پناه ایزلب کیلگن. اونگه کوره، اوشبو بدرغه‌لرنینگ کییمی، باش پناه‌سی، آذیق آوقتی یوق دیر و کیچه‌لرنی یول‌لر چیک‌که‌سیده، آی یاغدوسی‌گه آچیلیک بیلن ایرته قیله‌دی.
تخار محلی حکومتی، بدرغه‌لر اوچون اردوگاه تیارلگن و بو اردوگاه‌ده، اولرگه آذیق آوقت و دارو ترقته‌دی. جناب ابراهیمی‌نینگ ایتیشیچه، محلی حکومت‌نینگ سیار گروهی کیچه‌هم بدرغه‌لرنی توپله‌یدی.
عین حالده، قندوز اوروشی‌ده بدرغه بولیب، تخار مرکزی تالقان‌ده باش پناه ایزلب کیلگن بدرغه‌لردن بیرقطاری‌نینگ ایتیشیچه، کیچه‌لر آچ یاته‌دیلر و حاضرگچه دولت و باشقه یاردم بیرووچی قوریلمه‌لر تامانیدن اولرگه یاردم بیریلمه‌گن. شونینگ‌دیک اولرنینگ ایتیشیچه، تالقان یشاوچی‌لریدن بیرقطاری اوروش بدرغه‌لری نامی بیلن بیر قطار اداره‌لردن یاردم قولگه کیریته‌دی.
بیراق تخار ولایتی سرپرستی‌نینگ ایتیشیچه، محلی حکومت بو مسئله‌گه دقت قیلیب و بدرغه‌لرگه «مهاجرلیک کارت» بیرگن.
عین حالده، تخار ولایتی قیزیل غاچ بنیادی باشلیغی جاوید مخدوم‌زاده‌نینگ ایتیشیچه، اولر 500 دن آرتیق عایله‌گه آذیق آوقت و کییم ترقتگن. اونگه کوره، تالقان شهری محلی حکومتی حوزه‌بندلیک قیلگن و قیزیل غاچ بنیادی «کهنه شهر» دن «گولایی باغ» گچه جایلشگن بدرغه‌لرگه یاردم بیره‌دی.
بدرغه‌لردن کوپینچه‌سی تخار دولتی اداره‌لری و قیزیل غاچ بنیادی آرقه‌سیده صف تارتیب تیزیاردم بیریش‌لرینی سوره‌یدی. بیراق تخار سرپرستی‌نینگ ایتیشیچه، یالغیز قیزیل غاچ بنیادی انباریده بولگن ماده‌نی بدرغه‌لرگه ترقتگن و باشقه اداره‌لر اولرگه یاردم بیریش خصوصیده قادر ایمس دیر.
طالب‌لر اوتکن هفته کینگ شکلده قندوز اوستیگه هجوم اویوشتیریب، مذکور شهر اداره‌سینی قولگه آلدی. اوتکن (دوشنبه) کون امنیتی کوچلرنینگ معلوم قیلیشیچه، شهرنی بوتونله‌ی طالب‌لردن تازه‌لگن؛ بیراق ایتیلیشیچه، طالب‌لر اوتکن کیچه مذکور شهر اوستیگه قیته‌دن هجوم اویوشتیریب و شهر نیچه نقطه‌سینی قولگه آلگن.
بوندن آلدین، مهاجرلر وزیرلیگی‌نینگ ایتیشیچه، قندوز اوروشی کمیده بیش مینگ عایله‌نی بدرغه قیلگن.
