قندوز ولایتینینگ تومنلریده آواز بیرووچیلرنینگ رویخطگه آلیش جریانی باشلنگنیدن 10 کون اوتهدی؛ بیراق قندوز ده سیلاولر ایرکین کمیسیونینینگ ولایتی دفتری مسؤوللرینینگ ایتیشیچه، امنیتی تهدیدلر باعث، حاضرگچه مذکور ولایتنینگ 4 تومنیده آواز بیرووچیلرنینگ رویخطگه آلیش اوچون هیچ بیر مرکز آچیلمهگن.
مذکور تومنلرنینگ یشاوچیلریدن بیرقطارینینگ ایتیشیچه، یشاوچیلر رویخطگه آلینیشی اوچون دولت تامانیدن زمینه یرهتیلیشی کیرهک.
سلاموطندارگه صحبت بیرگن قندوز ولایتیده سیلاولر ایرکین کمیسیونینینگ ولایتی دفتری سرپرستی محمدرسول عمرنینگ ایتیشیچه، اوشبو ولایتنینگ مرکزی و تومنلریده نمایندهلر کینگشی و تومنلر کینگشی سیلاولری اوچون آواز بیرووچیلرنینگ رویخطگه آلیش 220 مرکز موجود و بو جملهدن یالغیز 65 مرکز فعال و باشقه 155 مرکز امنیتی تهدیدلر باعث، یاپیق قالگن.
عمرگه کوره، قندوز ولایتینینگ 9 تومنی بار و 4 تومنیده آواز بیرووچیلرنینگ رویخطگه آلیش اوچون هیچ بیر مرکز آچیلمهگن.
قندوز ولایت کینگشی باشلیغی محمدیوسف ایوبینینگ ایتیشیچه، ایریم تومنلرده آواز بیرووچیلر رویخطگه آلینمهگن صورتده، مذکور تومنلرنینگ یشاوچیلری تومنلر کینگشی اعضالرینی تنله آلمهیدیلر و سیلاولر جریانی ناقص بولیشی ممکن.
قندوز یشاوچیلریدن بسمالله و جهانگیرنینگ سلاموطندارگه ایتیشیچه، چهاردره تومنیده آواز بیرووچیلرنینگ رویخطگه آلیش یالغیز بیر مرکز موجود و بو مرکز مراجعتچیلر اوچون ییترلی ایمس دیر؛ چونکه مراجعتچیلردن کوپینچهسی قیینچیلیک باعث، بو مرکزگه مراجعت قیله آلمهیدی.
اولرنینگ کوپهیتیریشیچه، قلعهزال تومنیده حاضرگچه آواز بیرووچیلرنینگ رویخطگه آلیش اوچون هیچ بیر مرکز فعال بولمهگن و بو وضعیت دوام قیلگن صورتده، اولر آواز بیریشدن محروم قالهدیلر.
قندوز پولیسی سوزلاوچیسی انعامالدین رحمانینینگ ایتیشیچه، ایسلنگن تومنلرنینگ کوپینچه منطقهلریده طالبلر حاکمیت قیلهدی و شو یوزهدن اولر آواز بیرووچیلرنینگ رویخطگه آلیش مرکزلرنی فعال قیله آلمهگنلر.
رحمانی گه کوره، آواز بیرووچیلرنینگ رویخطگه آلیش مرکزلر آچیلیشی اوچون امنیتی تدبیرلر آلینگن و تیزلیکده تومنلرنینگ تینچ منطقهلریده آواز بیرووچیلرنینگ رویخطگه آلیش مرکزلر آچیلیشی ممکن.
آواز بیرووچیلرنینگ رویخطگه آلیش جریان باشلنگنیدن بویان قندوز ده 53 مینگدن آرتیق کیشی رویخطگه آلینگن و بو جملهدن 18 مینگ و 500 تهسینی عیاللر تشکیل بیرهدی.
