قندوز شهری نینگ ملرغی وتلوکه منطقه‌سیده طالبان هجومی عاقبتیده، کماندو کوچلریدن 1 ته‌سی و ملی اردو کوچلریدن 9 ته‌سی هلاک و باشقه 6 ته‌سی یره‌لنگن.
قندوز ولایتی کینگش اعضاسی امرالدین ولی نینگ سلام‌وطندارگه ایتیشیچه، طالبان جنگریلری اوتگن کیچه قندوز شهری نینگ ملرغی ساحه‌سیده ملی اردو پوسته‌سی اوستیگه هجوم قیلگن و نتیجه‌ده کماندو کوچلریدن 1 ته‌سی و ملی اردو کوچلریدن 9 ته‌سی هلاک و باشقه 6 ته‌سی یره‌لنگن.
217 پامیر قول اردو قومندانلیگی سوزلاوچیسی عبدالهادی جمال نینگ ایتیشیچه، طالبان جنگریلری اوتگن کیچه تخار-قندوز قتناو یولیده جایلشگن ملی اردو پوسته‌سی اوستیگه هجوم قیلگن.
اونینگ کوپه‌یتیریشیچه، آتیشمه عاقبتیده طالبان قیزیل قطعه‌سی اعضالریدن 6 ته‌سی هلاک و باشقه 9 ته‌سی یره‌لنگن.
جناب جمال، دولتی کوچلرنینگ تلفاتی خصوصیده معلومات بیرمه‌یدی.
عین‌حالده، طالبان سوزلاوچیسی ذبیح‌الله مجاهد نینگ ایتیشیچه، اوشبو گروه جنگریلری نینگ هجوم‌لری عاقبتیده، دولتی کوچلردن 15 ته‌سی هلاک و باشقه 10 ته‌سی یره‌لنیب و شونینگدیک، امنیتی کوچلرگه تیگیشلی بولگن ایکی هاموی تانگ تخریب بولگن.
اونینگ کوپه‌یتیریشیچه، آتیشمه عاقبتیده طالبان اعضالریدن بیرته‌سی هلاک ایتیلگن.
