فیفا نن شپه ۱۰ بجې د فوټبال غوره لوبغاړی اعلانوي

ټاکل شوې ده، د فوټبال نړیوالې شورا (فیفا) له خوا نن شپه د (جنورۍ پر ۹مه) د افغانستان پر وخت ۱۰ بجې د ۲۰۱۶م کال غوره فوټبال لوبغاړی اعلان کړي.

د فیفا رسمي وېبپاڼي د معلوماتو له مخی، د نن شپې کلنیو جایزو کې به تر ټولو د کال غوره فوټبال لوبغاړي جایزه ارجنټایني لیونیل میسي، پرتګالي کریسټیانو رونالډو او یا هم فرانسوي انټوني ګریزمین وګټي.

وايي، چې د فوټبال نړیواله شورا به د جایزو په دې پروګرام کې د سویس په زیوریخ ښار کې ټولټال ۷ جایزې ډالۍ کړي.

د کال غوره فوټبال لوبغاړي ترڅنګ به غوره ښځینه لوبغاړې، غوره نارینه روزونکي، غوره ښځینه روزونکې، غوره ګول وهونکي، غوره اخلاق او غوره مینه وال ته هم جایزې ورکړل شي.

د کال غوره مینه وال له پاره رایه اچونه نن ماسپښین د افغانستان پر وخت ۱ نیمه بجه بنده شوه؛ خو د غوره ګول له پاره رایه اچونه به د جایزو د پروګرام پر مهال بنده شي.

دغه راز نن شپه به د جایزو په پروګرام کې د نړۍ د بېلابېلو مخکښو فوټبال لوبغاړیو له ډلې څخه چې د ۲۰۱۵ کال ډېسمبر له لومړۍ نېټې څخه یې د ۲۰۱۶ کال د نومبر تر ۲۸ مې نېټې ښې لوبې کړې وي؛ په نړیواله کچه د ۴۵ زره مسلکي فوټبال لوبغاړیو د رایو پر اساس د (فیفا) د ۱۱ کسیزې غورې لوبډلې په توګه اعلان شي.

د فوټبال نړیوالی شورا د معلوماتو له مخې، د ۲۰۱۶ کال غوره نارینه او ښځینه فوټبال لوبغاړیو او غوره نارینه وو او ښځینه روزونکیو ته په نړیواله کچه رایې ورکړل شوې دي.

د یادې شورا پر وینا، ۲۵ سلنه د فوټبال ملي لوبډلو کپټانانو، ۲۵ سلنه د فوټبال ملي لوبډلو روزونکیو، ۲۵ سلنه یو شمېر منتخبو خبریالانو او ۲۵ سلنه په نړیواله کچه د فوټبال مینه والو د خوښي لوبغاړیو او روزونکيو له پاره رایې کارولي دي.

فیفا زیاتوي، چې د نن شپې ګټونکیو له پاره د تېر۲۰۱۶ کال د نومبر میاشتې له ۴ مې نېټې نه د نومبر تر ۲۲ مې نېټې رایې کارولې دي.

له دې مخکې د فوټبال غوره لوبغاړي او نورې کلنې جایزې په ګډه د فوټبال نړیوالې شورا او فرانسې فوټبال ادارې له خوا ورکول کېدې؛ خو له څه مودې راهیسې د دواړو ادارو ترمنځ ملګرتیا پای ته ورسېده.