د لوړو زده کړو وزیرې فريدې مومند د مشرانو جرګې استجوابیه غونډه کې وویل، چې د نوي تقنیني فرمان د پلي کولو له مخې به ټولټال د پوهنتونونو د ۵زره ۷ سوه او ۸۶ استادانو له جملې به ۱۳۴ استادان تقاعد ته سوق شي.
مېرمن مومند وايي، چې د پوهنتون استادانو ستونزې يې له ولسمشر سره شریکې کړي او ډېر ژر به حل شي.
د هغه په خبره افغان ولسمشر به ډېر ژر له د پوهنتون له استادانو سره هم خبرې اترې ولري.
د لوړو زده کړو وزیره وايي، چې د نوي قانون طرحه پخپله د پوهنتون استادانو په سلا مشوره جوړه شوې ده او په وزیرانو شورا کې یواځې د ۶۵ کلونو په عمر د استادانو د تقاعد او څو نورو برخو کې بدلون را وستل شوی دی.
د مشرانو جرګې په نننۍ (یکشنبې) غونډه کې د لوړو زده کړو وزیرې وکیلانو ته وویل، چې تر اوسه یواځې د درېیو پوهنځیو ازموینې نه دي اخیستل شوي او په راتلونکو دوو اونیو کې به واخیستل شي.
مېرمن فریدې هغه اوازې هم رد کړې، چې د نوي قانون طرحې له تصویب وروسته به شاوخوا۷۰۰ استادان تقاعد شي او هغه شمېر استادان چې په ۶ کلونو کې یې ترفیع نه وي کړي منفک به شي.
د لوړو زده کړو وزیره زیاته کړه، چې دغو شمېر استادانو ته به د ظرفیت لوړولو زمېنه برابره کړي.
په ورته وخت کې د لوړو زده کړې وزیرې مشرانو جرګې استازو ته ډاډ ورکړ، چې دا ځل به د تېرو کلونو په پرتله د کانکور ازموینه رڼه وي.
دغه راز د خصوصي پوهنتونونو رییس محمد امیر کاموال وویل، چې د خصوصي پوهنتونونو د جوړولو په اړه یې نوې کړنلاره جوړه شوې ده، که تصویب شي نو ډېرې ستونزی به حل شي.
کاموال وویل، چې دولتي او خصوصي پوهنتونونو تر منځ د یپلومونو توپیر باید له منځه لاړشي.
هغه دا هم وویل، چې په جرمني هېواد کې ۱۰۰ زره دیپلومونه تر چاپ لاندې دي او د روان کال دلوې میاشت پورې به یې شاوخوا ۵۰ زره به یې را ورسیږي.
ده جرګې ته وویل، چې د خصوصي پوهنتونو په کیفیت هم کار روان دی او خصوصي پوهنتونو د استادانو امتیاز به د دولتي پوهنتون د استادانو سره برابر شي.
د لوړو زده کړو وزارت وزېره په داسې حال کې مشرانو جرګې استجوابیه غونډې ته ور بلل کیږي، چې له دې مخکې د کابل پوهنتون استادانو د قانون نوې طرحې په اړه په پرلپسې ډول اعتراضونه وکړل.
