د فراه ولایت ولسي شورا غړي د ناامنیو زیاتېدو پړه پر سیمه ییزو چارواکو ور اچوي او وايي، چې پر فراه ښار د طالبانو برید له امله څه باندې ۳ زره کورنۍ هرات ته کډه شوي دي.
د فراه ولسي شورا غړو د یکشنبې په ورځ ( اکټوبر۱۶مه) هرات کې خبري غونډې ته وویل، چې طالبانو د فراه ولایت زیاتې سیمې نیولي او د ولایت مرکز يې کلابند کړی دی.
د یادې شورا غړي، د سیمه ییزو چارواکو خپلمنځي اختلافونه، په ګمرکونو کې ستر فساد، د دغه ولایت بخش اباد بند جوړیدو، د ټاپي پروژې پلي کېدو او د چابهار ترانزیتي لارې جوړیدو مخنیوي په اړه د ګاوندیو هیوادو لاسوهنه دغلته د نا امنیو لاملونه بولي.
د فراه د ولسي شورا دوه غړي فرید ثبات او احمد رزاق صیفي وايي، چې په فراه ولایت کې د منظمې استراتیژۍ تشه، د امکاناتو نشتوالی، د فراه د سیمه ییزو چارواکو ترمنځ د انډول نشتوالی او په فراه کې پراخ فساد د مخالفتونو او د دولت مخالفینو حضور لامل شوی دی.
دوی وايي، چې اوسمهال د وسله والو طالبانو او امنیتي سرتېرو ترمنځ یو پل چې تقریبا ۱۰۰ متره واټن لري پاتې دی.
خو د فراه د والي ویاند محمد ناصر مهري سلام وطندار ته وویل، چې امنیتي ځواکونو د فراه زیاتره سیمې له طالبانو پاکې او اوس د ښار نږدې په څو کلیومتري کې عملیات روان دي.
مهري د ولایتي شورا او والي ترمنځ هر ډول اختلاف ردوي خو وايي، چې ګاونډيو هیوادو دغلته د بخش اباد بند جوړیدو، د ټاپي پروژې پلي کیدو او د چابهار ترانزیتي لارې جوړیدو مخنیوي له پاره دغه ولایت نا امنه کړی.
د فراه د والي ویاند پروینا، طالبان په بالابلوک، بکوا او پشت رود ولسوالیو کې شته، خو دا ولسواليانې بیا ستر امنیتي ګواښ نه شي پېښولی.
له دې ټولو سره سره، د فراه د ولسي شورا غړي له حکومته غواړي چې په دغه ولایت کې د امنیت ټینګښت له پاره بنسټیزه لار ومومي.
