فراه ولایتی کینگش اعضالریدن بیرقطاری مرکزی حکومت نی دقت سیزلیگیدن تنقید قیلیب ایتیشیچه، طالبان گروهی اوتگن کیچه تورت تاماندن فراه شهری، خاک سفید و بالابلوک تومنی اوستیگه هجوم قیلگن.
فراه ولایتی کینگش اورین باسری شاهمحمود نعیمینینگ سلاموطندارگه ایتیشیچه، طالبلرنینگ خاک سفید تومنیدهگی هجوملری نتیجهسیده، محلی پولیس کوچلریدن کمیده 45 تهسی هلاک ایتیلگن. جناب نعیمیگه کوره، اوشبو گروهنینگ فراه شهریدهگی هجوملریده امنیتی کوچلردن 9 تهسی طالبلر قولیگه توشیب و ایکی تینچاهالی شامل 5 کیشی هلاک و باشقه 4 کیشی یرهلنگن.
فراه ولایتی کینگش اورین باسرینینگ ایتیشیچه، مذکور ولایت بالابلوک تومنینینگ کنسک منطقهسیده امنیتی کوچلردن ایکی تهسی طالبلر تامانیدن اولدیریلگن.
فراه ولایتی کینگش اعضاسی گلاحمد فقیری مرکزی حکومتدن تنقید قیلیب سلاموطندارگه ایتیشیچه، اوشبو ولایت حکومت تامانیدن معامله ایتیلگن.
شونینگدیک فراه یشاوچیلرینینگ سلاموطندارگه ایتیشیچه، فراه ولایتی حکومت تامانیدن معامله ایتیلگن صورتده، حکومت امنیتی کوچلرنینگ تلفاتیگه توسیق بولسین.
فراه پولیس قومندانلیگینینگ سوزلاوچیسی محبالله محب طالبلرنینگ هجومینی تصدیقلب ایتیشیچه، بو هجوملر نتیجهسیده امنیتی کوچلردن بیرقطاری هلاک ایتیلگن، بیراق ارقاملری بیللی ایمس. جناب محب گه کوره، مذکور هجوملرده طالبلر قوماندانلریدن بیری ملانور آقا 5 عسکری بیلن هلاک بولگن.
عینحالده، طالبلر سوزلاوچیسی قاری یوسف احمدینینگ ایتیشیچه، اوشبو گروه جنگریلرینینگ فراه شهری و خاکسفید تومنیدهگی هجوملری نتیجهسیده، امنیتی کوچلردن کمیده 40 تهسی هلاک ایتیلگن.
