د فاریاب د اندخوی ولسوال سلطان محمد سنجر وايي، د بېدار په نوم د طالبانو یوه ډلمشر د دغې ولسوالۍ «خانقاه» سیمه کې یوه کور ته دننه شوی او د دغې کورنۍ ۶ غړي یې وژلي او ۲ نور یې ټپیان کړي دي.
نوموړي وویل، وژل شويو کسانو کې ۳ نجونې، ۲ هلکان او یو نوی زېږېدلی ماشوم او ټپیانو کې یوه ښځه او یو ماشوم شامل دی.
د اندخوی ولسوال سلطان محمد سنجر په وینا، طالبانو ځکه دغه ۶ کسان وژلي چې د دغې کورنۍ یوه غړي پخوا د طالبانو لیکو کې فعالیت کاوه او اوس له دغې ډلې بیل او عادي ژوند یې پیل کړی و.
امنیتي مسوولان هم دا د طالبانو کار بولي، خو طالبانو تراوسه دې اړه څه نه دي ویلي.
