د فاریاب ولایتي شورا مرستیال صبغتالله سیلاب وايي چې د چینایانو په نوم کمپ کې نږدې ۱۵۰ کلابند سرتېري له ۴۸ ساعته کلابندۍ او مرستندویه ځواکونو نه رسېدو له امله طالبانو ته تسلیم شول.
د فاریاب ولایتي شورا مرستیال، په غورماچ ولسوالۍ کې کلابند شویو سرتېرو ته د حکومت نه پاملرنه د امریکا ولسمشر وروستۍ پرېکړې سره تړي چې امنیتي ځواکونه د افغانستان لرې پرتې سیمې خوشې کړي.
د چینایانو په نوم کمپ کې یو شمېر کلا بند شویو سرتیرو د دې پوځې اډې له سقوطه مخکې د حکومتي مشرانو پر نه پاملرنې نیوکې سره ویلي چې د هغوی په وینو مامله شوېده.
د دوی په وینا، د چینایانو کمپ له سقوط سره د غورماچ ولسوالۍ په مرکز کې د ملياردو ۶ کنډک د سقوط خطر هم جدي شویدی.
په ورته وخت کې یوې امنیتي سرچینې د نوم نه ښودلو په شرط سلام وطندار ته وویل چې طالبانو د ملياردو ۶ کنډک کلابندو سرتېرو ته خبرداری ورکړی چې د نن ورځې تر ۱۰ بجو پورې باید له خپلو ټولو تجهیزاتو سره تسلیم شي؛ خو د ملياردو ځواکونو له هغوی تر څلورو بجو پورې وخت غوښتی.
د چینایانو په نوم کمپ دمګړۍ د طالبانو لاس ته لوېدلی چې دا پوځي اډه له څوو میاشتو راهیسې د طالبانو تر سخت ګواښ لاندې وه او په غورماچ ولسوالۍ کې امنیتي ځواکونه د میمنې ـ غورماچ لویې لارې تړلو له امله د هوا له لارې اکمال کېدل.
