د کندوز والي اسدالله عمرخېل د دې ولایت په مرکز کې د سردورې ښارګوټي یو جریب شنه سیمه غصب کړې او د ولایت ویاند، منشي، د سکتور ریاست سرپرست، د ولایت د عامه پوهاوي مسوول او د پولیسو څلورمې حوزې امر ته توضیع کړې ده.

په کندوز ولایت کې یوې سرچینې د نوم نه خپرولو په شرط سلام وطندار ته وویل، والي اسدالله عمرخېل دا ځمکه د ولایت منشي میرویس احمدزي، د مقام ویاند او د سکتور ریاست سرپرست سید محمود دانش، د ولایت د عامه پوهاوی مسوول نعمت الله تیموري، او د پولیسو څلورمې حوزې امر خالدالدین خالد ته توضیع کړې ده.

د دې ځمکې د ابادولو چارې د مدني فعالانو او اعتراض کوونکو له غوغا کولو وروسته تېره ورځ درول شوي دي.

د کندوز ولایت یو مدني فعال عنایت الله خلیق د کوم غاصب نوم نه اخلي؛ خو وايي، دا ځمکه د کندوز ولایت د باصلاحیتو چارواکو له خوا غصب شوې ده.

د دې ولایت د پولیسو څلورمې حوزې امر خالد الدین خالد د سردورې ښارګوتي د ځمکې په غصبولو کې خپل لاس لرل ردوي؛ بلکې وايي، نوموړي دا ځمکه د غاصبانو له منګولو ژغورلي او اوس یې دسیسه ورته جوړه کړې ده.

دغه راز د ولایت مقام منشي میرویس احمدزي، د ولایت د عامه پوهاوي مسوول نعمت الله تیموري دغه ادعاوې ردوي او وايي، په دې اړه هېڅ معلومات نه لري.

د کندوز د والي ویاند او د سکتوري ریاست سرپرست سید محمود دانش سلام وطندار ته وویل، د والي له خوا د ځمکې غصب په برخه کې هېڅ ډول اسناد موجود نه دي.

دانش وايي، پر ده د غصب ادعا یوازې د مخالفو او حسدو ډلو کار دی.

د کندوز والي ځمکې غصب کړي دي

له دې مخکې هم سلام وطندار راپور خپور کړی و، چې پربنسټ یې د کندوز والي اسدالله عمرخېل د خپلواکو مدافعو وکیلانو ټولنې ځمکه غصب کړې وه.