کوپلب مدنی فعاللر، ولایتی کینگش نمایندهلری و فاریاب ییگیتلری حکومت نینگ ولایتلریگه توجه قیلمهگنلیگی دلیل اعتراض بیلدیردیلر و ولایتلری ساختمانینینگ ایشیگیگه قفل تشلهدیلر.
بوگونکی اعتراضچیلر حکومت نینگ توجه سیزلیگی گه قرهتیب شعار بیریب، تیزلیکده ولایتلریگه والی و پولیس باشلیغی تعیین ایتیلیشینی ایستهدیلر.
شو سونگیده فاریاب سابق سرپرستی عبدالستار بارز بغلان والیسی حیثیده تعیین ایتیلدی و شونینگدیک، ولایت پولیس باشلیغی جمهور رییس تامانیدن سرپرست بولیشی بیلن اوز ایشینی ترک ایتیب کیتگن ایدی.
اعتراضچیلر «فاریابنی جدی توتینگ، قندوز فاجعهسینی فاریابده عملگه آشیرمنگ، فاریابیم قان ییغلیدی» دیگن شعارلرنی یازیب، ولایت ایشیگینی قمهدیلر. اعتراضچیلر مرکزی حکومتدن ولایتلری امنیتیگه جدی توجه قیلیشینی ایستهیدیلر.
شونینگدیک بو اعتراضچیلر جمهور رییس و حکومت اجرایی باشلیغیدن ایستیدیلر تا فاریابلیک قشاق و ایش سیزلرگه ایش زمینهسی یرهتیلسین.
اولر، حکومت فاریابلیکلر وضعیتیگه توجه قیلمهگن صورتده، یوکسک اعتراضنی یولگه قویشلریدن آگاهلنتیرهدیلر.
فاریاب ولایتی کینگش عضوی عبدالاحد ایلبیک نینگ ایتیشیچه، ایکی آیدن بویان هرکون اوتیشی بیلن ولایت امنیتی وضعیتی یمان بولیب بارماقده؛ اما حکومت رسمیلری سیاسی قرمه قرشیلیکلر بیلن مصروف.
فاریاب مدنی فعاللریدن بیری جاوید کیوان نینگ ایتیشیچه، ایکی آیدن بویان ولایتده طالبلر اوز حربی مرکزلرینی مستحکملشگه اولگورهدی. اونینگ کوپهیتیریشیچه، قندوز فاجعهسی فاریاب اهالیسی اوستیگه تکرار بولمسدن، باید حکومت خلق حیاتی و امنیتی اوچون انیق لایحه بیلن صحنه گه کورینسه.
ایکی آیدن بویان بو ولایتده طالبلر نفوذلرینی کوپلشتیریب بارماقده. شو سونگیده جنگریلر نیچه تاماندن فاریاب مرکزی، میمنه شهریده هجوم اویوشتیردیلر، اما مردمی کوچلر قرشیلیگی بیلن روپهره بولیب، اهدافلریگه ایتیشه آلمهدی. شونینگدیک جنگری طالبلر نیچه کون آلدین گورزیوان تومنینینگ اوز تصرفلریگه آلگن ایدی؛ ولی مذکور تومننی اسرهب تورالمهدیلر و قیته دولت تصرفیگه اوتدی.
ایتیلیشیچه، شوحاضر فاریاب ولایتی نینگ غورماچ تومنیدن کوپلب ادارهسی طالبلر تصرفیگه اوتگن.
