ننگرهار ولایتینینگ یشاووچیلری نیچه کوندن بیر 28- اسدنی نشانلش اوچون تیارگرلیک کوره دیلر.
اوشبو کونده، تیک اوچرلر آرقهلی افغانستان بیرهغی همده اوشه وقت پادشاهسی امان اللهخاننینگ صورتلری هوا دن اهالی گه ترقهتیلیشی کوتیلهدی. شونینگدیک مذکور صورتلر حاضردن ایریم موترلر همده دیوارلرگه یاپیشتیریله باشلهگن.
بوکونلرده ننگرهارنینگ سیماسی اوزگرگن.
ایتیلیشیچه، اون کوندن بیری تیارگرلیک کوریلهدی. بو مراسم حکومتگه چیکلهنیب قالمی ولایت یاشلری و یشاووچیلری مذکور کوننی نشانلش اوچون مخصوص تیارگرلیک کورماقدهلر.
ننگرهار ولایت والیسی سلیمخان قندوزینینگ ایتیشیچه، ولایت یشاووچیلری همده یاشلرینی 28- اسدنی کوتیب آلیش اوچون کوره دیگن مخصوص تیارگرلیکلرنی کوزهتیش بیلن اوزینی خوش حس قیلهدی.
جناب قندوزیگه کوره، اوتگن زمانلر بوکوندن اونچهلیک شکوهلی شکلده نشانلنمهگن، اما جاری ییل ننگرهار انه شو مناسبت بیلن طنطنهلی بیرهم گواهی بولهدی.
ننگرهار ایریم منطقهلری افغانستان بیرهغی یاپیشتیریلیشی بیلن سیماسی اوزگرگن، بو حرکت ولایت یاشلرینینگ هم کوریشنلریگه اساسی اوزگریش کیلتیرگن.
ولایت مدنی فعاللریدن بیری هدایتالله زهیرنینگ سلاموطندارگه ایتیشیچه، یاشلر 28- اسدگچه هم اوز تیارگرلیکلریگه دام بیره دیلر.
اونینگ سوزلریگه کوره، حاضرگه امانالله خان صورتی همده افغانستان بیرهغی نی تیاریلب فرهنگی یاشلری اشتراکی بیلن ننگرهار ولایتینینگ ایریم مهم نقطهلریگه یاپیشتیرگنلر.
جلال آباد شهرینینگ یشاووچیلریدن باشقه بیری عرفانالله عرفانگه کوره، اوشبو تاریخی کوننی کوتیب آلیش اوچون خوشلیک احساس قیلیب، مستقل بیر مملکتده حیات کیچیره یاتگنیمدن نهایت خرسند من.
باشقه تاماندن یازووچی محمد نعمان دوستگه کوره، مستقللیک نی نشانلش برچه اهالی بیر- بیراوی یانیده بولیب مملکتنی توزهتیش گه امکان یرهتهدی.
اونگهکوره، افغانستان بیرهغی نی کوتاریش یاشلرنینگ آنگینی کوتاریب یاروغ کیلهجکدن درک بیرهدی.
ایتیش کیرهک که اوتگن ییللرده افغانستان مستقللیگی فقط حکومت تاماندن نشانلهنیب کیلینگن.
افغانستان مستقللیگی بوندن 96 ییل آلدین امان اللهخان آرقهلی انگلیسلر (بریتانیا) دن آلینگن و بوکون هر ییلده افغانستانده نشانلنهدی.
