فراه ولایتیده امنیتی واقعهلر و سِرلی قتللر میزانی آشگنی باعث، مذکور ولایت یشاوچیلری خواطر بیلدیرگنلر.
سلاموطندارگه صحبت بیرگن فراه ولایت کینگشی باشلیغی فرید بختورنینگ ایتیشیچه، اوتگن بیر آی جریانیده فراه شهریده دولت ایشلاوچیلری، امنیتی کوچلر و تینچ اهالیدن 30 کیشی هلاک ایتیلگن.
جناب بختورگه کوره، ینگی بیر قضیهده بوگون توشدن سونگ، فراه شهریده بیر پولیس ترور ایتیلگن و شونینگدیک، اوتگن کیچه مذکور ولایتنینگ مرکزی احصائیه ریاستی باشلیغی قلعۀ زمان منطقهسیده قوراللی کیشیلر تامانیدن نشانگه آلینیب قتل ایتیلگن.
شونینگدیک، اوشبو ادعالرنی تصدیقلگن فراه ولایت کینگشی اعضاسی دادالله قانع نینگ ایتیشیچه، دولت ادارهلری بو وضعیت آلدی آلینیشی اوچون حاضرگچه هیچ بیر ایش قیلمهگن.
بیراق، فراه پولیس قومندانلیگی سوزلاوچیسی محبالله محب، ترور واقعهلری کوپهییش دلیلینی شخصی دشمنلیکلر دیب بیلهدی.
شونینگدیک، فراه حاکمی سوزلاوچیسی ناصر مهری، اوشبو واقعهلرنینگ عاملی شخصی دشمنلیکلر دییدی. بیراق اونینگ ایشانچی گه کوره، مذکور ولایت نینگ ایریم بولیملری طالبلر تامانیدن نظارت گه آلینگنی سبب، ترور میزانی آشگن. عین حالده، جناب مهری فراه ده بو وضعیت آلدی آلینیشی اوچون تشقی کوچلردن بیر قطعه جایلشتیریلیشیدن خبر بیرگن.
