وزیر محمداکبرخان مسجدی گه یوزبیرگن پارتلش و مذکور مسجد امامی محمدایاز نیازی هلاک بولگنی ایچکی و تشقی عکسالعمللرگه روپهرو بولدی.
مملکت جمهوررئیسی محمداشرف غنی اوشبو مسجد ده یوزبیرگن پارتلش نی قارهلب، اونینگ ترورچیلیک بیر هجوم دیدی. جناب غنی نینگ ایتیشیچه، مسجدلر، تکیهخانهلر، کسلخانهلر، تینچاهالی و عامه تأسیساتلرگه قرشی هجوم قیلیش انسانیت گه قرشی جنایت دیر.
شونینگدیک جمهوررئیس غنی مذکور حادثه نی تیکشیریش اوچون بیر بویروغ آرقهلی حج و اوقاف وزیرلیگی سرپرستی عبدالحکیم منیب رهبرلیگی آستیده بیر هیأت تعیین قیلدی.
شونینگدیک ملی مصالحه عالی کینگش باشلیغی عبدالله عبدالله، وزیر محمداکبرخان مسجدی گه یوزبیرگن حادثه نی ترورچیلیک و ظالمانه بیر هجوم دیگن.
جناب عبدالله مسئول نهادلردن مذکور حادثه قندهی یوزبیرگنی توغریسیده تدقیقات قیلیب و اونینگ نتیجهسینی اهالی بیلن شریک قیلیشلرینی سورهدی.
جمهورلیک ریاست بیرینچی اورینباسری امرالله صالح وزیرمحمداکبرخان مسجدی نینگ امامی دکتر ایاز نیازی هلاک ایتیلگنی گه عکسالعمل بیلدیریب ایتیشیچه، حادثه عاملی طالبان گروهی دیر.
جمهورلیک ریاست بیرینچی اورینباسری فیسبوک رسمی صحیفهسیده یازیشیچه «طالبان ایکی جمله یازیش بیلن اوزلرینی جنایت و ترور دن برائت بیره آلمهیدی.»
بیراق طالبان گروهی مذکور حادثه گه قوللری بارلیگی نی رد قیلیب، اونینگ قارهلگن. شونینگدیک ناتو تشکیلاتی هم بو حادثه نی قارهلگن. بو تشکیلات بیر خبرنامه ترقهتیب نماز ادا قیلهدیگنلر و عمومی اجتماعات گه هجوم اویوشتیریش نی قبول قیلینمهس دیگن.
ناتو نینگ خبرنامهسیده کیلیشیچه، افغانستانلیکلر تینچ بیر حیات گه سزاوار دیر و افغانستان گه تینچلیک تأمینلنگونگه قدر بو تشکیلات افغانستان دن حمایت قیلهدی.
عین حالده، افغانستان بوییچه ناتو تشکیلاتی نینگ ملکی نمایندهسی ستیفانو پونتیکورو، وزیر محمداکبرخان مسجدی گه یوزبیرگن پارتلش نی قارهلگن.
شونینگدیک مملکت سیاستچی و رسمیلریدن قطاری فیسبوک و توییتر صحیفهلریده اوشبو حادثه نی قارهلگن و جناب نیازی هلاک ایتیلیشی نی جبران بولمهی دیگن بیر ضایعه دیگن.
دکتر ایاز نیازی (سهشنبه کونی 13- جوزا) کیچ قورون وزیرمحمداکبرخان مسجد اطرافیده ییرلشتیریلگن ماین پارتلشی باعث تن جراحتی کوتاریب و کسلخانهده جان بیردی. ایچکی ایشلر وزیرلیگی نینگ ایتیشیچه، مذکور حادثهده 2 کیشی هلاک و باشقه 2 کیشی یرهلنگن.
