فاریاب ولایتی‌نینگ محلی رسمیلری غورماچ ولسوال‌لیگی قورال‌لی طالب‌لر تامانی‌دن تصرف ایتیلگن‌لیگینی تصدیق‌لب، ولسوال‌لیک سقوط قیلیشی‌نینگ بیرینچی عاملی پولیس کوچلری‌نینگ تورت آیدن بیری آیلیگی تولنمس‌لیگی همده ییترلی درجه‌ده حربی جهاز بولمه گن‌لیگی‌نی دلیل قیلیب کورستگن‌لر.
ولایت کینگشی‌نینگ رییسی سیدعبدالباقی‌نینگ سوزلریگه کوره، ولسوال‌لیک‌نینگ برچه اداره‌لری جنگری طالب‌لر اشغالی‌گه اوتگن.
غورماچ ولسوال‌لیگی شنبه‌دن یکشنبه‌گه اوترکیچه‌سی طالب‌لر تصرفی‌گه اوتگن.
جناب هاشمی مذکور ولسوال‌لیک تورت کون قورال‌لی طالب‌لر قورشاوویده بولگن‌دن سونگ نهایت کیچه جنگری‌لر اشغالی‌گه اوتگن دیگن. او، ولسوال‌لیک دولت مخالف‌لر آرقه‌لی تصرف ایتیلیشی‌نینگ بیرینچی دلیلی ملی پولیس کوچلری آیلیگی ییتکزیلمس‌لیگی همده حربی جهاز بولمه‌گن لیگی‌دن کیلیب چیقه‌دی دیگن.
غورماچ ولسوال‌لیگی بیش یوز کیشی‌لیک قطعه‌سی‌نینگ قوماندانی سید آصف‌نینگ تیلفون آرقه‌لی سلام‌وطندارگه ایتیشیچه، ملی کوچلر جنگری‌لر قورشاوویده قالگن‌دن کیین نیچه مرته امنیتی مسوول‌لریدن همکارلیک سوره‌گن‌لیکلری ایجابی نتیجه بیرمه‌گن. اونگه کوره، حاضر آرت‌گه قیتگن‌لر. پولیس کوچلری ایسه ولسوال‌لیک‌نینگ اوچ پوسته‌سی‌گه جایلشگن‌لر.
ایتیلیشیچه، هنوز هم ملی کوچلر بیلن قورال‌لی طالب‌لر اورته‌سیده اوروش جریانی بار.
فاریاب ولایتی‌ده شاهین 209- قول اردو قوماندانی شیرین‌شاه کوه‌بندنینگ سلام‌وطندارگه معلوم قیلیشیچه، ملی کوچلر برچه‌سی ولسوال‌لیک‌دن چیقاریلیب تاغلی منطقه‌لرده جبهه آلگن‌لر. اونینگ سوزلریگه قره‌گنده، امنیتی کوچلرنینگ حربی قرارگاهی ولسوال‌لیک مرکزی‌نینگ بیر کیلو مترلیگیده جایلشگن و ملی کوچلر ایسه قیته‌دن ولسواللیکنی اوز اداره‌لریگه آلیش‌لری ممکن لیگی ایتیله‌دی.
عین حالده، قورال‌لی طالب‌لر مذکور ولسواللیکنی اوز تصرفی‌گه آلیش بیلن فاریاب ولایتی‌نینگ قیصار تومنی‌گه هجوم قیلیشی توغریسی‌ده خواطرلر موجود.
غورماچ بوندن ایکی هفته آلدین فاریاب ولایتی‌نینگ گرزیوان ولسوال‌لیگی جنگری‌لر تصرفی‌گه اوتگن بیر چاغ‌ده سقوط قیلماده. لیکن، گرزیوان 24 ساعت‌دن سونگ قیته ملی کوچلر آرقه‌لی کنترول‌گه آلینگن ایدی.
فاریاب سونگی وقت‌لرده مملکت‌نینگ اینگ نا برقرار ولایت‌لریگه ایلنگن. بوندن نیچه وقت ولایت نینگ بیر قطار ولسوال‌لیک‌لری قورال‌لی طالب‌لردن تازه‌له‌نیشی اوچون افغانستان جمهور رییسی‌نینگ بیرینچی اورین باسری رهبرلیگی‌ده حربی تازه‌لش عملیات اوتکزیلگن ایدی. اما ایریم گزارش‌لرده قورال‌لی طالب‌لر مذکور منطقه‌لرنی قیته‌دن تصرف ایتگن‌لیگی ایتیله‌دی.
