غور ولایت محلی رسمیلرنینگ ایتیشیچه، اوتکن بیرهفته جریانیده امنیتی کوچلر و طالبلر ارا یوزبیرگن توقنه شوولرده 121 طالب هلاک بولیب و باشقه 40 تهسی تن جراحت آلگن.
اوتکن هفته دهگی توقنه شوولرده 500 دن آشه طالب، گروهی شکلیده اوچ تاماندن چهارسده تومنیگه هجوم اویوشتیرگندن کیین باشلنگن.
شونینگدیک، پنجشنبه کونی غور رسمیلری جنگری طالبلر مذکور ولایت پسابند تومنیگه هجوم اویوشتیرگنلریدن خبر بیرگنلر. رسمیلرگه کوره، مذکور ایکی تومنده طالبلرگه آغیر تلفات ییتکیزیلگن.
غور ولایت سرپرستی سیدانور رحمتی، شنبه کونگی خبری ییغینده چیقیش قیلیب ایتیشیچه، چهارسده تومنیدهگی بیر هفتهلیک توقنه شوولرده طالبلردن 101 کیشی هلاک بولیب و 30 کیشی یرهلنگن. شونینگدیک پسابند تومنیدهگی توقنه شوولرده 20 طالب هلاک بولیب و باشقه 10 تهسی تن جراحت آلگن.
غور سرپرستیگه کوره، مذکور ایکی تومندهگی توقنه شوولر جریانیده 12 عسکر هلاک بولگن و باشقه 13 تهسی یرهلنگن. اونگه کوره، بو جملهدن 8 عسکر چهارسده تومنیده و 4 تهسی پسابند تومنیده هلاک بولگنلر.
شونینگدیک رحمتینینگ ایتیشیچه، بیر هفتهلیک توقنه شوولر جریانیده، 50 موترسایکل و 14 میل کلاشینکوف امنیتی کوچلر قولیگه توشگن.
غور والیسیگه کوره، طالبلر ایکی تومن مرکزیدن کیینگه سوریلگن، اما توقنهشوو چهارسده و پسابند تومنلرینینگ اطرافیده دوام ایتماقده. رحتمیگه کوره، امنیتی کوچلر عملیاتی مذکور ایکی تامان طالبلر نابود ایتکونگه قدر، پاکلش عملیات دوام ایتهدی.
غور والیسینینگ ایتیشیچه، مذکور ولایت پسابند تومنیدهگی طالبلر، دولت کماندو و هوایی کوچلری آرقهلی هدفگه آلینگن.
بوندن آلدیدن غور والیسینینگ سوزلاوچیسی عبدالحی خطیبی، طالبلر چهارسده تومنی مرکزیگه ییتیب کیلگن و مذکور تومن طالبلر قولیگه توشیشی ممکنلیگینی بیلدیرگن ایدی.
خطیبی، چهارسده تومنینینگ امنیتی وضعیتی یمان بولگن، امنیتی کوچلر مذکور تومنده ییتمه گن بیر چاغده، امنیتی کوچلر تلفاتیگه قوشیمچه، مذکور تومن طالبلر قولیگه سقوط قیلیشینی بیلدیرهدی.
شونینگدیک تینچ اهالیدن بیرقطاری مذکور تومن امنیتی وضعیتی توغریسیده خواطر بیلدیریب، بو توقنه شوولر جریانیده تینچ اهالیگه زیان ییتگنینی معلوم قیلگن.
ایتیلیشیچه، مذکور تومنلر مرکزیدهگی تینچ اهالیدن کوپینچهسی اویلرینی ترک ایتیب، باشقه قشلاقلرگه تامان کیتگنلر.
نیچه پیتدن بویان اولکه ایریم منطقه سیده طالبلر امنیتی کوچلرگه قرشی هجوم اویوشتیریب کیلردی و حاضر امنیتی کوچلر ایسه ناتینچ ولایتلرده جنگریلرگه قرشی کورهشهدیلر
