پکتیا محلی حکومتینینگ بلند مرتبهلی رسمیلری، ولایت مرکزینی باغلاوچی آلتی تومننینگ یولی آچیلگن لیگیدن خبر بیریشماقدهلر.
پکتیا ولایت والیسینینگ سوزلاوچیسی نقیباحمد اتلنینگ ایتیشیچه، افغان ملی کوچلری مذکور یولنی آچیش اوچون اوتکزگن عملیاتده قوراللی طالبلرنینگ 9 تهسینی اولدیرگنلر.
قوراللی طالبلر بوندن ایکّی کون آلدین ولایت مرکزینی باغلاوچی آلتی تومن یولینی ترافیک یوزیگه یاپیب قویگن ایدی.
شونینگدک ولایت والیسینینگ سوزلاوچیسی، مذکور یول ترافیک یوزیگه آچیلیشی اوچون هوادن هم هجوم اوتکزیلگن دیدی.
اونینگ ایتیشیچه، حاضر احمدخیل و میرزکی تومنلری افغان ملی کوچلری اختیاریگه اوتگن. اوروش جریانیده بوزیلیب کیتگن کوپریک و کوپریکچهلرنی قیته قوریش ایشی باشلنگن دیگن سوزلاوچی.
عین حالده، پکتیا پولیس قوماندانی محمد ایوب، جنگری طالبلرگه قرشی ولایتنینگ بیش تومنیده حربی تازهلش عملیات دوامی بارلیگینی تیلگه آلگن. لیکن، تینچ اهالیگه تلفات ییتمسلیک اوچون عملیات اَسته – سیکن ایلگری آلیب باریلهدی دیگن قوماندان.
باشقه تاماندن، پکتیا ولایتینینگ یشاوچیلری دولت همده قوراللی طالبلردن اوروش جریانیده عادی اهالیگه زیان ییتکزمسلیکلرینی سورهگنلر.
محل اهالیسی، دولت بیلن طالبلر اورتهسیده یوز بیره دیگن اوروش آقیمیده دایم تینچ اهالی آغیر زیان کورهدی دیگنلر.
