پروان ولایتینینگ یشاووچیلریدن یوزلرچهسی جهادی قوماندانلردن بیریگه تیگیشلی قورال اسلحه انباری اوستیگه ناتو کوچلری تامانیدن اویوشتیریلگن هجومگه قرشی اعتراض بیلدیریب، ناراضیلیک نمایشگه قول اورگنلر.
دوشنبه کونی ایرتهلب ساعت 4 اطرافیده، ائتلافی کوچلری چاریکار شهری «بایان» منطقهسیده بیر اولتیریش اویده جایلشتیریلگن قورال اسلحه انبارینی هجوم آستیگه آلگن.
محل یشاووچیلرینینگ ادعا قیلیشیچه، بو عملیاتده، جهادی قوماندانلردن بیرینینگ اویی شامل، باشقه بیرقطار اوی ویران بولگن.
اعتراضچیلر کابل- مزار قتناو یولینی توسیب، ائتلافی کوچلرینینگ محل یشاووچیلری و خلقدن کیچریم سورهشینی ایستهگنلر.
پروان امنیه قوماندانی جنرال محمدزمان مموزی، بو واقعهنی تصدیقلیب ایتیشیچه، بو عملیات افغان امنیتی کوچلری بیلن اویغونلیک بولمسدن عملگه آشیریلگن.
پروان والیسینینگ سوزلاووچیسی وحید صدیقینینگ ایتیشیچه، بیرهیأت ولایت اورین باسری رهبرلیگیده اعتراضچیلر بیلن سوزلهشیب، اولرگه ایستکلرینی ملی بیرلیک حکومتی رهبرلریگه ییتکزیش گه وعده بیرگن. بو هیأت اعتراضچیلردن تیزلیکده ناراضیلیک نمایشلرینی یکونلنتیریب کابل- مزار قتناو یولینی آچیشلرینی سورهگن.
تصدیق لنمهگن گزارشلرگه کوره، نیچه مرته خلق ارا کوچلری «بایان» قیشلاغیدهگی جهادی قوماندانلردن ذخیره قیلگن قورال اسلحهلرینی افغانستان دولتیگه تاپشیریشینی سورهگن، بیراق اوشبو قوماندانلر قورال اسلحهلرینی دولتگه تاپشیریشدن باش تارتگن.
