سلام‌وطندارگه صحبت بیرگن غور ولایت کینگشی اعضالریدن بیرقطاری‌نینگ ایتیشیچه، مذکور ولایت‌نینگ چهارسده تومنیده افغان امنیتی کوچلری نیچه هفته‌دن حربی جهاز و ییگولیک آذیق-آوقت کم‌لیگی‌گه روپه‌ره بولیب قالگن‌لر.
غور ولایت کینگشی اعضاسی غلام‌سخی جاویدنینگ ایتیشیچه، قوراللی طالب‌لر مذکور تومن‌نی نظارت گه آلیش اوچون ایکی آیدن بویان هجوملرینی شدت‌لنتیرگن بیرچاغده، بو قیین‌چیلیک وجودگه کیلگن.
ولایت کینگشی‌نینگ اوشبو اعضاسی‌نی آگاه‌لنتیریشیچه، مذکور عسکرلرگه حربی جهاز، ییگولیک آذیق-آوقت و یاردمچی کوچ یوباریلمه‌گن صورتده، طالب‌لر چهارسده تومنی‌نی نظارت گه آله‌دیلر.
اونگه کوره، قوراللی طالب‌لر مذکور تومن‌نی نظارت گه آلیش اوچون بادغیس و سرپل ولایت‌لریدن کوچ توپله‌گن.
بیراق، غور حاکمی سوزلاوچیسی عبدالحی خطیبی‌نینگ ایتیشیچه، چهارسده تومنی‌نینگ مینگ قیشلاغی نیچه کوندن بویان طالب‌لرنینگ قمراویده دیر و بو قیشلاق نینگ اهالیسی ییگولیک آذیق-آوقت کم‌لیگی‌گه روپه‌ره بولگن.
شونینگدیک، غور پولیس قومندانی شاه‌آغانینگ ایتیشیچه، چهارسده تومنیده‌گی امنیتی کوچلرنینگ ییترلیچه حربی جهازلری بار و یالغیز آذیق-آوقت کم‌لیگی‌گه روپه‌ره بولگن‌لر و اولر بو قیین‌چیلیک‌نی حل قیلیش اوچون عسکرلریگه نقد پول یوباره‌دیلر.
غور پولیس قومندانی گه کوره، اوتگن کیچه هم قوراللی طالب‌لر مذکور تومن‌نی اوستیگه هجوم قیلگن‌لر؛ لیکن آغیر تلفات بیریب مغلوب ایتیلگن‌لر.
غورنینگ چهارسده تومنی ولایت مرکزی فیروزکوه شهری‌نینگ 100 کیلومترلیگی‌ده جایلشگن و اونینگ ییرلی یولی دولتی رسمی‌لر اینیقسه امنیتی کوچلرنینگ باریب و کیلیشی‌گه توسیق دیر. بو تومنده بولگن امنیتی کوچلرنینگ برچه لجستیکی خذمت‌لری 3 ییل‌دن بویان حربی اوچاقلری آرقه‌لی عمل‌گه آشیریله‌دی.
