مملکت جمهوررئیسی محمداشرف غنی نینگ ایتیشیچه، تینچلیک سوزلشوولری باشله‌نیشی اوچون، طالبان محبوس‌لری نینگ قوییب یوباریش پروسه‌سینی تیزلشتیره‌دی و بو توغریده جدی اقدام قیلینیشی ممکن.
شونینگدیک جناب غنی طالبان‌دن مذکور گروه توتقونیده بولگن امنیتی کوچلرنینگ قوییب یوباریش پروسه‌سینی تیزلشتیریش‌لرینی سوره‌گن.
بوگون (یکشنبه 4- جوزا) جمهورئیس غنی ارگ ده رمضان بیره‌م نمازینی ادا قیلگندن کیین بیرگن بیاناتی گه طالبان گروهی تامانیدن اعلام ایتیلگن اوچ کون‌لیک آتیش کیسین نی خوش قرشی‌لب و بو گروه‌دن افغانستان اهالیسی نی بوندن آرتیق آزارلنتیرمه‌ی و تینچلیک‌که ایریشش اوچون دایمی آتیش کیسین قیلیش‌لرینی سوره‌دی.
جناب غنی افغانستان‌لیکلرارا سوزلشوولر باشله‌نیشی نی افغانستان قیینچلیگی حل ایتیلیشی اوچون اساسی یول بیلیب ایتیشیچه، حکومت تامانیدن تعیین ایتیلگن هیأت مذاکره قیلیش گه تیار دیر.
شونینگدیک جمهوررئیس نینگ ایتیشیچه: «تینچلیک بیزلرنینگ ملی ایسته‌گی‌میز دیر و تینچلیک کیلیشوونامه‌سی شخص و گروه گه تیگیشلی بولمه‌ی افغانستان اهالیسی گه تیگیشلی بولگنی نی بیلیشی‌میز کیره‌ک و تینچلیک کیلیشوونامه‌سی توغریسیده نهایی قرار افغانستان اهالیسی گه تیگیشلی دیر.»
عین حالده، ملی مصالحه عالی کینگش باشلیغی عبدالله عبدالله، طالبان گروهی تامانیدن اوچ کون‌لیک آتیش کیسین اعلام ایتیلیشی نی مملکتده تینچلیک تأمین ایتیلیشی اوچون ایجابی بیر اُدیم بیله‌دی.
جناب عبدالله، بو آتیش کیسین افغانستان ده محبوس‌لرنی قوییب یوباریش پروسه‌سینی تیزلشتیریشی و زوروانلیک میزانی نی کمه‌یتیریشی توغریسیده امید بیلدیرگن.
ایتیش کیره‌ک کیم، اوتگن کیچه طالبان گروهی بیر اعلامیه آرقه‌لی رمضان بیره‌م کون‌لریده اوچ کون‌لیک آتیش کیسین اعلام قیلدی.
طالبان گروهی تامانیدن آتیش کیسین اعلام قیلینگنیدن بیر نیچه دقیقه کیین، جمهوررئیس غنی اوشبو اوچ کون‌لیک آتیش کیسین نی خوش قرشی‌له‌دی. جمهوررئیس غنی بیر توییت آرقه‌لی امنیتی کوچلرگه بو اوچ کونده آتیش کیسین قیلیب و تهاجمی عملیات‌لری نینگ توخته‌تیش‌لرینی سوره‌دی.
افغانستان حکومتی و طالبان گروهی تامانیدن اوچ کون‌لیک آتیش کیسین اعلام ایتیلیشی آمریکا، ناتو، کانادا و قطار مملکتلر تامانیدن خوش قرشی‌لندی.
