ولسمشر محمد اشرف غني نن د سولې عالي شورا مشرتابه سره په غونډه کې ټینګار وکړ، چې نور دې په ګاونډیو هېوادونو کې د کډوالو موجودیت سره لوبې نه کېږي.
د ولسمشر په وینا، هرځل چې افغانستان د ګاونډیو هېوادونو په اړه خبرې کوي دغه هېوادونه د کډوالو بېرته راستنېدو مسله مطرح کوي.
هغه ټینګار کوي نور دې له کډوالو د اوزار په توګه کار نه اخیستل کېږي.
ولسمشر وايي، افغانستان د کډوالو بېرته راستنېدو پرته بشپړ نه دی.
غني زیاته کړه، د کډوالۍ ښکارنده باید په اساسي توګه حل او په ګاونډیو هېوادونو کې د کډوالو بېعزتي نور د منلو نه ده.
ویې ویل، چې په راتلونکې کې د خلیج غونډه جوړیږي او په دې غونډه کې به د کډوالو مسلې په اړه هم خبرې اترې وشي.
دغه راز ولسمشر غني غونډې ته وویل چې افغان حکومت په هره کچه له وسلهوالو مخالفو ډلو سره د سولې غوښتونکی دی.
دا داسې مهال دی چې د ترهګرو ملاتړ لهامله پر پاکستان د نړیوالو فشارونو له زیاتېدو وروسته د دغه هېواد کابینې پرېکړه وکړه؛ شاوخوا دوه میلیونه هغه افغان کډوال له خپلې خاورې وباسي چې د کډوالۍ کارتونو موده يې ختمه شوې ده.
