افغان ولسمشر محمد اشرف غني وايي، اجازه به ورنه کړي، چې د افغانستان په نظام کې قانوني تشه رامنځته شي.
همدارنګه ولسمشر ژمنه وکړه، چې په دې هکله هر ډول پرېکړه به د افغانستان د اساسي قانون او د هېواد د ملي ګټو په رڼا کې او د ملي اجماع د پرېکړو پر بنسټ وشي.
له ولسمشرۍ ماڼۍ نه په خپره شوې خبرپاڼه کې راغلي، چې ولسمشر غني د ولسي جرګې د برخلیک ټاکلو، د يادې جرګې د انتخاباتو د ترسره کولو او د ټاکنیز نظام د اصلاح کمېسیون د کار د پېل په هکله نن شنبه (۲۰۱۵ زېږدیز/ جون۱۳) د مدني ټولنو غړو او نورو فعالانو سره د کتنې پر مهال زياته کړه، چې مدني فعالان باید خپلو دا شان غوښتنو ته دوام ورکړي.
د ارګ له لوري په خپره شوې خبرپاڼه کې دا هم راغلي، چې په دې ناستو کې د ښځو، رسنیو، مدني ټولنې، حقوق پوهانو او د یوناما د دفتر استازو حضور درلود.
له دې وړاندې د ولسي جرګې ځېنو غړو د خپل کاري او قانوني مودې د پوره کېدو په باب اندېښنې څرګندې کړې وې.
د افغانستان اساسي قانون په پنځم فصل ۸۳ مې مادې په دویم بند کې راغلي، چې " د ولسي جرګې د کار دوره د پنځم کال د چنګاښ په لومړۍ نېټه د ټاکنو د پایلو د اعلان څخه وروسته پای ته رسيږي او نوې شورا په کار پېل کوي."
د قانون له مخې د ولسي جرګې ټاکنو ته شاوخوا ۹ ورځې پاتې دي.
مودې ته په کتو سره باید اوس د نوي شورا نتایج اعلان او ۹ ورځې وروسته نوي وکيلان د لوړې مراسم پرځای کړي وی.
د ولسي جرګې رییس عبدالروف ابراهيمي بیا، د ځېنو وکیلانو اندیښنې، چې د چنګاښ په لومړۍ نیټه به د دې جرګې کار پای ته رسیږي پرځای نه بولي.
نوموړي په نننۍ عمومي غونډه کې یوځل بیا پرحکومت غږ وکړ، چې ژر تر ژره دې د ولسي جرګې او ولسوالیو ټاکنو نېټه دې اعلان کړي.
هغه وايي، اوسمهال د ولسي جرګې د کاردوام مشروعیت لري او د ۱۵ تقنیني دورې لسم اجلاس لاهم نه دی پیل شوی.
د ولسي جرګې تېره یعنې ۱۵ دوره لس اجلاسه درلودل او کار یې هم د پنځم کال د چنګاښ په لومړۍ نیټه پای ته نه و رسیدلی.
د ولسي جرګې غړې شکریه بارکزۍ هم په دې ټینګارکوي، چې د دوی د کار دوره د چنګاښ په لومړۍ نیټه نه دی پیل شوی.
هغه وايي، نه باید ځینې کارپوهان قانون په خپل زړه تفسیر کړي.
په همدې حال کې د ولسي جرګې غړی ډاکتر رمضان بشردوست وایي، چې که د ټاکنو نیټه ژر تر ژره اعلان نه شي، نو د چنګاش له لومړۍ نیټې وروسته د کار دوام دلیل خلکوته نه لري.
دی زیاتوی، که ولسمشرد ټاکنو نیټه ونه ټاکي دا به له ولسي جرګې له برخلیک سره لوبې وي.
