افغان ولسمشر محمد اشرف غني د کوچني اختر په مناسبت په خپله وینا کې وسله والو طالبانو سره د سولې خبرو اترو ، له پاکستان سره د اړیکو او ځينو نورو مهمو موضوعاتو ته اشاره وکړه.
ولسمشر زیاته کړه، چې نه باید هرځل له صفره پېل وکړو.
هغه وویل، چې د طالبانو مشر ملا محمد عمر په اختریز پېغام کې ستونزو او معضلاتو حل ته د سوله ییزې لارې اقدام کول یو ښه مثبت بدلون دی.
نوموړی په داسې حال کې د صفر نه د حکومت پېل خبره کوي، چې د راپورونو پر بنسټ طالبانو د سولې د خبرو اترو په لومړي پړاو کې، د ځينو نورو غوښتنو ترڅنګ يوه يې دا وه، چې باید له سره د (ملي متحد) حکومت په نامه موقت حکومت جوړ شي.
غني په اسلام اباد کې وروستۍ خبرې په افغانستان کې د سولې لپاره اړینې وبللې.
محمد اشرف غني د کمکي اختر په مناسبت په خپل پېغام کې
ویلي، چې د نوي حکومت له جوړېدو سره سم یې له اسلام اباد سره د خبرو هڅه پېل او له دغه هېواد سره د پر لپسې خبرو لاره غوره کړه.
هغه د خبرو اترو څخه وروسته د پاکستان وروستي، څو عملي ګامونه د ستاينې وړ وباله.
اشرف غني زیاته کړه، چې له پاکستان او طالبانو سره به سوله د ملي ګټو په رڼا کې کيږي.
هغه په خپل پېغام کې دا هم وویل، چې د سولې خبرو اترو له هر پړاو څخه به عام وګړي خبروي او هر څه به په رڼه او شفاف ډول پر مخ ځي.
غني زياته کړه، چې د پاکستان او طالبانو سره سوله کول دواړه باید په موازي ډول تعقیب شي.
د هغه په وينا، پاکستان او طالبانو سره سوله کول جلا میکانیزم ته ضرورت لري.
هغه وايي، دیني عالمانو، مدني فعالانو او نورو اړخونو سره سره مشورې کړې دي او د هغوی نظر يې هم اخیستی دی دا، ځکه چې د واقعي سولې له پاره ملي اجماع او ملي وفاق ته ضرورت دی.
ولسمشر په خپل پېغام کې دا هم ويلي، چې تراوسه پورې د سولې په برخه کې پر ۹۰ سلنو مسایلو اتفاق شته او په پاتې پنخه فیصده موضوعاتو بحث روان دی.
ده ټينګار کړی، چې د خلکو اساسي حقونه او په تېره بیا د ښځو حقونه به په هیڅ وجه له پامه ونه غورځوي.
افغان ولسمشر ويلي، چې له طالبانو سره سوله کوو، خو د بهرنيو تروریستانو سره به د افغان ځواکونو مبارزه د تل په څېر جدي روانه وي.
په همدې حال کې د ولسمشر اجرايوي مشر ډاکټر عبدالله عبدالله هم په خپل لېږل شوې خبرپاڼه کې ویلي، چې ډېر ژر به د خلکو په ژوند کې مثبت تغیر راوړل شي.
هغه ويلي، چې افغانستان سختو ورځو څخه د تېرېدو په حال کې ده.
ډاکټر عبدالله د خلکو اقتصادي ژوند ته په اشارې سره ویلي، چې هر څه به د سولې راتګ سره پای ته ورسيږي.
