د افغانستان جمهور رییس محمد اشرف غني د ښاري پراختیا په درېيم ملي کنفرانس کې وویل، چې پرته له خدمتونو وړاندې کولو د ښاروالیو له لوري د پېسو او مالیاتو ټولول به هېوادوالو ته د منلو وړ نه وي.
په دغه غونډه کې، چې نن دوشنبه (نوامبر ۷مه) په ارګ کې جوړه شوې وه، ولسمشر محمد اشرف غني وویل، د هیواد ښارونو ته له یوې منظمې تګلارې پرته پراختیا ورکړل شوې، چې پر وینا یې دغه کار د هېوادوالو پرمخ د پراخو ستونزو د زېږېدو لامل شوی دی.
خو ولسمشر غني ټینګار وکړ، حکومت د پلازمینې اوسیدونکو ته د ښاري خدمتونو په برخه کې پلان ترلاس لاندې لري، چې له مخې به يې له ټولو تاریخي ځایونو او کابل سیند څخه ساتنه وشي.
د غني پر وینا، د کابل ښار اوسنی وضعیت د اندېښنې وړ دی، خو پر خبره يې حکومت هڅه کوي چې کابل ښاریانو ته د اوبو پيداکولو او کثافاتو په لرې کولو کې بنسټيزه حل لاره ولټوي.
ولسمشر غني وویل، ښاروالۍ باید د عوایدو او مالیاتو د راټولولو په بدل کې خلکو ته خدمتونه وړاندې کړي.
ولسمشر غني وايي، چې په وروستیو کې ښاري خدمتونو پراخ شوي، خو دا پراختیا د منلو وړ نه ده او باید د ښارونو په وضعیت کې بنسټیز بدلون رامنځته شي.
ولسمشر محمد اشرف غني زیاته کړه، چې په همدې موخه له دې وروسته ارزښتناکه ځمکې نه پلوري او "که خصوصي سکټور پرې د پانګونې لیوالتیا لري له دولت سره په همکارۍ دې پرې پانګونه وکړي."
دغه راز، د ښاري پراختیا وزیر سید منصور سعادت نادري جوړې شوې غونډې ته وویل، چې د تېر یوه کال په موده کې يې د ښارونو معیاري کولو له پاره ځينې پروګرامونه پلي کړي دي، خو د قناعت وړ نه دي.
نادري زیاته کړه، چې د زورواکو له خوا د ناقانونه ښارګوټو جوړول، د کډوالو راستنېدل، په ښارونو کې د کلیوالو راغونډېدل او د ښار بنسټیزو برخو له پاره د قوانینو نشتون له هغو ستونزو ګڼل کیږي، چې ښاریان ورسره مخ دي.
