ولسمشر محمد اشرف غني وايي، چې د بروکسل تر ناستې پورې به د افغانستان حکومت د یو باثباته او د اعتماد وړ بوديجې څخه برخمن وي.
هغه په ارګ د "سام" ناستې ګډونوالو ته وویل، هلته به یواځې انګېرنې نه منعکس کيږي، بلکې د افغانستان اقتصادي حالت سره سم به په ياده غونډه کې د افغانستان په عوایدو کې هم ډېر زیات ډېروالی راغلی وي او اقتصاد به د جوړېدو خوا ته روان وي.
ولسمشر محمد اشرف غني زیاته کړه، د اقتصادي کړنو د تطبیق له پاره يې، چې پرون شپه او نن (سپټمبر ۵ مه) کومې نظریې وړاندې کړې، هېڅکله هم ورته پرته له دې افغانانو ته د کار زمینه برابره شي نه شو رسېدی.
هغه د (SOM) ناستې ګډونوالو ته، چې تېر ماښام په ارګ کې پرانیستل شوه زیاته کړه، د مامورينو په معاشونو کې د توازن راوستلو د هوکړې په باب له خپل اقتصادي ټيم څخه د مننې ترڅنګ وویل، چې د مالي عامه مديریت په برخه کې د اصلاحاتو راوستل به د افغانستان د اقتصاد له پاره ګټور تمام شي.
هغه په خپلو ويناوو کې وویل، چې د افغانستان نفوس ته په کتو سره لوړ فیصدي ځوانان تشکیلوي، نو باید پر دغه انساني سرچينې پانګونه وشي.
ده څرګنده کړه، چې افغانستان کولی شي د اسیا په ختیځ کوریا، جاپان، چین او تایوان کې د ودې د بهیر له تجربو څخه په ښه ډول ګټه واخلي.
د هغه په خبره ، دغو هېوادونو پانګونه له ډېرو لږو تولیداتو پېل کړه او د داخلي سکټور په پیاوړتیا او د صادراتي تولیداتو په زیاتونه کې یې له هغې څخه ګټه واخیستله او بالاخره یې په نړېوالو بازارونو کې په سیالۍ لاس پورې کړ.
غني خصوصي شرکتونو ته د ښوکاري زمینو برابرولو په برخه کې وویل، چې " موږ باید د کورنیو او بهرنیو شرکتونو، چې تولیدي سرچینې او د کار د رامنځته کولو منابع دي" پر وړاندې پراته خنډونه له خصوصي سکټور سره په مشوره کې لرې کړو.
افغان ولسمشر په هېواد کې د سولې د ټینګښت له پاره د ملي یووالي د حکومت هڅو ته د اشارې په ترڅ کې وویل، چې دی او ډاکټر عبدالله عبدالله په هېواد کې د سولې او ثبات د ټینګښت له پاره خپلو هڅو ته ژمن دي.
محمد اشرف غني زیاته کړه، چې د سولې له پاره به د افغانانو غوښتنې دوام ولري او افغانستان او پاکستان به داسې یو مطلوب حالت ته ورسیږي، چې وبه کولی شي د خپلو خلکو د نیکمرغۍ او سوکالۍ له پاره خپل اقتصاد ته وده ورکړي.
محمد اشرف غني دا هم وویل، چې سولې خبرې اترې به د روانو وژنو د پای ته رسولو په موخه روان وي، ځکه پر وينا يې افغانان سولې ته تمایل لري او زیاتې خبرې اترې به وژنو ته د پای د ټکي ايښودو په پار روانې وي.
دا په داسې حال کې ده، چې د پاکستان د ملي امنیت او د بهرنيو چارو سلاکار سرتاج عزیز تېره ورځ کابل ته راغلی وو او د ریکا په اقتصادي ناسته کې هم وینا وکړه.
ولسمشر غني په افغانستان د ګاز ذخیرې ته په خپلو ویناوو کې اشاره وکړه او زیاته يې کړه، چې ډېر ژر به د ګازو د ذخیرې له پاره نوې تګلاره اعلان شي، چې د پانګه والو اعتماد او د شبرغان د ګازو د ذخیرو د ښه والي لپاره به په راتلونکي کې علاقمندي ډېره کړي.
نوموړي همدارنګه وویل، چې د مخابراتو په برخه کې د پانګونې د هڅونې له پاره به موږ خصوصي برخو ته اجازه ورکړو، چې د فایبر نوري شبکې په جوړولو کې کار وکړي.
محمد اشرف غني ژمنه وکړه، چې د مالیې وزارت به یو ګډ وزارتي او ګډ څانګیزه کمېټه د مالیې ورکولو د پالیسۍ له پاره جوړه کړي، چې مشري به یې هم د مالیې وزارت کوي.
جمهوررئیس غني د سام ناستې ګډونوالو ته په خپلو خبرو کې وویل، چې حکومت به يې کابينې ته د سوداګرۍ د جواز له یوه کاله تر دریو کالو پورې د اوږدولو وړاندیز وکړي او دا به د ثبتونې او د کار د جواز د اخیستو په برخه کې د اسانتیا لپاره یو ستر کار وي.
غني د خپلو خبرو په پای کې زیاته کړه، چې د بدلون د لسیزې په پای کې به په بهرنیو مرستو پورې د افغانستان تړلتیا راکمه شي او زموږ هېواد به د یوې داسې اتحادیې غړی وي چې له ډیموکراسۍ او بشري حقونو څخه ملاتړ او خپله راتلونکې به د سوداګرۍ او پانګونې له لارې مصوونه کړي.
دا په داسې حال کې ده، چې تېر ماښام يې هم په پرانستونکي ويناوو کې وویل، د افغانستان اتصال او یوځای کېدل افغانستان ته دا فرصت ورکوي، چې یو ځل بیا د اسیا د سوداګریزې څلور لارې تاریخي رول ترلاسه کړي.
