په غزني ولایت کې نن سهار په ګډې امنیتي غونډه کې چې د ملي دفاع وزیر طارقشاه بهرامي، د ملي امنیت عمومي ریاست یو مرستیال او د کورنیو چارو وزارت یو مرستیال حضور درلود، د غونډې ځای ته په مخامخ ودانۍ دوه توغندي لګېدلي دي.
د والي ویاند محمدعارف نوري وايي، په دې پېښه کې د ملي اردو دوه سرتېري ټپيان شوي دي.
نوري وايي، دغه امنیتي غونډه د غزني ولایت د امنیتي ځواکونو همغږۍ دفتر په مرکز کې جوړه شوې وه چې طالبانو پرې توغندي راویشتلي دي.
په غونډه کې د ملي دفاع وزیر طارقشاه بهرامي ویلي دي طالبان هڅه کوي دغه ولایت ناامنه کړي خو دا ولایت د دولت لهپاره ځانګړی ارزښت او د نظام د رهبرۍ د پاملرنې په محراق کې ځای لري.
سربېره په دې دوه نور توغندي د غزني ولایت د ښاروالۍ او پوهنې ریاست په ودانیو لګېدلي دي.
د غزني ولایت د پوهنې ریاست ویاند شفیقالله قاریزاده او دغهراز عنایتالله عرفان د دې ولایت د ښاروالۍ د عامه اړیکو مسوول پېښه تاییدوي. دوی وايي، په دې پېښو کې د دواړو ادارو ۵ تنه کارکوونکي ټپيان شوي دي.
غزني ته د دغو امنیتي چارواکیو د سفر موخه د دې ولایت د امنیتي حالت ارزول یاد شوي دي.
