د غزني والي عبدالکریم متین وايي، دغه ولایت کې د امنیت ټینګښت یوازېنۍ لار د وسله والو مخالفینو پر وړاندې د عامو خلکو مسلح کول دي.
عبدالکریم متین سلام وطندار ته وویل، افغان او بهرنیو ځواکونه په دې ولایت کې د امنیت په ټینګښت کې پاتې راغلي؛ اړتیا ده، چې ځايي خلک د وسله والو مخالفینو پر ضد مسلح کړل شي.
دی وايي، ارزانه، په وخت، اغېزمن او چټک کار د ولس په واسطه امن راوستل دي.
د غزني والي وايي، د خلکو اندېښنې یې له مرکزي حکومت سره شریکې کړي او د حکومت له خوا د جدي اقداماتو په تمه دی.
دی وایي، ترهګر هڅه کوي قومي او فرقه يي جګړې رامنځته کړي او دغزني د جاغوري ولسوالي په پرتله په نورو سیمو کې د دغه ګواښ بڼه توپیر لري.
عبدالکریم متین وايي، دوښمن د کابل ـ کندهار لار بندوي د سیمې خلکو سره کار نه لري او په جاغوري کې قومي مسلو ته د لمن وهلو لهپاره یو کلي ته د داعش په نوم راځي.
متین زیاته کړه، غزني کې امنیتي ځواکونه د وسله والو ډلو څو برابره دي؛ له دې امله د وسله والو مخالفینو فعالیتونه زیات شوي، چې تل عام خلک د ډال په توګه استعمالوي.
د غزني د ولایتي شورا رییس خالق داد اکبري وايي، چې د جاغوري ولسوالۍ په شاوخوا سیمو کې د داعش ډلې فعالیت پراخېدو خلک اندېښمن کړي او هره ورځ د داعش له خوا د بریدونو وېره موجوده ده.
د اکبري په وینا، خلک د حکومت پر ژمنو بې باوره شوي او چمتو دي خپله د نظام په ملاټر د امنیتي ځواکونو تر څنګ ودریږي.
مخکې تردې هم د غزني امنیه قوماندان جنرال امین الله پر جاغوري ولسوالۍ د طالبانو پراخو بریدونو په اړه خبردارې ورکړی و او زیاته کړې وه، چې له ۱۰۰ زیات وسله وال ګروپونه په دغه ولایت کې له امنیتي ځواکونو سره په جګړه دي؛ خو امنیتي ځواکونه کافي امکانات او تشکیلات نه لري.
