د ټاکنيزو شکايتونو د خپلواک کميسيون مرستيال مولوي دینمحمد عظيمي ويلي، که چېرې د ټاکنو خپلواک کميسيون له لوري پرېکړې سمې پلې شوې وای، ۶۵ نه تر ۸۰ زرو پورې رايې باطلېدې او د ټاکنو برخليک بدلېده.
له ياد کميسيون نه په خپره شوې خبرپاڼه کې راغلي چې د دې کميسيون غړيو نن د مدني ټولنو له بنسټ(مجما)، (ابرار) او د ملي ډيموکراټيک انسټيټيوټ له مسوولانو سره ليدلي دي.
د يادې اعلاميې پر بنسټ د ياد کميسيون رييسې زهرې بيان شينوارې په دې ليدنه کې ويلي چې ياد کميسيون خپلې ټولې دندې د ټاکنيزو طرزالعملونو په رڼا کې او د قانون په چوکاټ کې سر ته رسولې دي.
د ټاکنيزو شکايتونو کميسيون مرستيال مولوي دینمحمد عظيمي هم ويلي چې د ټاکنو خپلواک کميسيون د ټاکنيزو شکايتونو کميسيون پرېکړې د دواړو کميسيونونو د طرزالعمل مطابق نه دي پلې کړي.
دا په داسې حال کې ده چې د ټاکنو خپلواک کمیسیون له نږدې پنځو میاشتو ځنډ وروسته برحال ولسمشر محمد اشرف غني یو ځل بیا د ټاکنو ګټونکی اعلان کړ.
