د سیاسي ګوندونو یوشمېر استازي وايي، د ولسي جرګې په ټاکنو کې پراخې درغلۍ شوي چې د یادې پروسې مشروعیت ته یې زیان اړولی دی.
په همدې حال کې د ټاکنو خپلواک کمېسیون د ولسي جرګې ټاکنو مدیریت چې په ۲ ورځو کې د هېواد په ۳۲ ولایتونو کې وشوې، بریالی او د قناعت وړ بولي.
سیاسي ګوندونو په یوې خبرپاڼې کې لیکلي چې د ټاکنو بهیر کې بېنظمي، په یوشمېر ټاکنیزو مرکزونو کې د بایومټریک نهکارول او په خپل وخت د یوشمېر مرکزونو نهپرانستل، په یادې پروسې کې اصلي ستونزې وبللې. ګوندونو دغه راز لیکلي چې په ټاکنو کې شته نیمګړتیاوې او ستونزې له دې امله وې چې د ټاکنو کمېسیون د ګوندونو طرحه په پوره ډول منلې نه وه.
ملي ـ اسلامي جنبش غړی خانمحمد وحدت وايي، که څه هم ګوندونو په ټاکنو کې د خلکو پراخ ګډون هرکلی کوي، خو دغې پروسې کې داسې ستونزې او نیمګړتیاوې هم وې چې د ټاکنو مشروعی تر پوښتنې لاندې راولي.
ګوندونه د ټاکنو له کمېسیونه غواړي چې د هغو مرکزونو رایې باطلې اعلان کړي چې له بایومټریک سېسټم نه پهکې ګټه اخیستل شوې نه وي.
بلخوا د ټاکنو خپلواک کمېسیون که څه هم د ټاکنو مدیریت برخې کې ځینې ستونزې او کمۍ مني، خو وايي توانېدلي چې پر کمېسیون د خلکو باور ډېر کړي.
د ټاکنو کمېسیون د مالوماتو له مخې، د ولسي جرګې په سږنیو ټاکنو کې شاوخوا ۴ میلیونو کسانو ګډون کړی و.
دا په داسې حال کې ده چې تر دې وړاندې د ټاکنیزو شکایتونو کمېسیون مسوولانو او اجرایوي رییس عبدالله عبدالله هم په ټاکنو کې پر شویو درغلیو او نیمګړتیاوو نیوکې کړې دي.
