د معرفت ښوونځي بنسټ اېښودونکي عزیز رویش د نړۍ د غوره ښوونکي مقام تر لاسه نه شو کړای او پر ځای يې امریکایي نانسي اتویل، د نړۍ د غوره ښوونکې لقب وګاټه.
میرمن اتویل د وارکي نړېوال بنسټ د ځانګړې جایزې د ترلاسه کولو وروسته وویل، د زده کوونکو لپاره یې د ازادۍ او ټاکنې حق ورکړی، له دې امله زده کوونکي یې ویښ او بریالي دي.
اتويل سر بېره پردې، چې د نړۍ د غوره ښوونکې لقب یې خپل کړ د دې سیالۍ څخه يې یو میلیون ډالرو جایزه هم تر لاسته کړه.
عزیز رویش څه وخت وړاندې د (وارکي) نړېوال بنسټ له لوري د نړۍ د پنځوسو غوره ښوونکو څخه د ۱۰ غوره ښوونکو په توګه غوره کړ، خو نوموړي و نه شو کړای، چې لومړی مقام ترلاسه کړي.
روېش په یادو مراسمو کې خپلې تحصیلي کچې ته په اشارې سره وویل، چې له پنځو کلونو زیاتې زده کړې یې نه دي کړي، خو د ژوند په ټولو بر خو کې په دې لټه کې و، چې خپلې زده کړې او تجربې نورو ته ولیږدوي.
دی وایي "ویاړ کوم، چې د نړۍ لسو غوره ښوونکو" په ډله کې دی.
په دې مراسمو کې د دبی امير محمد بن راشد ال مکتوم، د متحده ایالاتو پخوانی ولسمشر بیل کلینتون او د وارکي بنسټ مشر سني وارکي ګډون درلودل.
د نړۍ د غوره ښوونکي جایزې موخه د ښوونکو ستاینه او په کړکېچنو شرایطو کې د روزنې او زده کړې په برخه کې لا زیات اغیزمن کار و.
هر کال په نړۍ کې په زرګونه ښوونکي د دې جایزې لپاره ځان ټاکي.
