د بدخشان ځايي چارواکي وايي چې بېګا شپه په فیضاباد ښار کې یو طالب د خپل ورور په مرسته خپله ښځه باندې ډزې کړي او وژلې یې ده.
د بدخشان د امنیې قوماندانۍ ویاند ثناالله روحاني سلام وطندار ته وویل چې دا ښځه ازاده نومېده چې بېګا ۷ بجې د فیضاباد په ۳مه نایحه کې وژل شوېده.
د ښاغلي روحاني په خبره، ازاده ۳۵کاله عمر او ۵ زامن لري چې څو میاشتې مخکې یې له مېړه نه د جدا کېدو غوښتنه کړېوه؛ خو د بدخشان استېناف محکمې یې د مېړه په نهشتوالي کې د هغې د طلاق حکم صادر کړ.
د ده په وینا، د استېناف محکمې له لوري دې ښځې ته د طلاق ورکولو حکم د دې سبب شو چې د مېړه له لوري ووژل شوه.
د دې کورني ۱۵کلن ماشوم وايي چې د شپې ۲۰ طالبان کور ته وردننه شول او کاکا یې ـ چې فاروق نومېږي ـ د ده په مور یې ډزې وکړې.
د بدخشان د ښځو چارو رییسه ذوفنون ناطق فیضاباد ښار ته د طالبانو ننوتلو نه په اندېښنې سره وايي، په بدخشان کې د ښځو ژوند له سختو ننګونو سره مخ دی.
