عبدالله عبدالله د افغان حکومت له لوري د اعلان شوي مرکچي پلاوي ملاتړ وکړ او هغه یې د بین الافغاني خبرو پيلیدو لپاره یو مهم ګام وباله.
د عبدالله له فېسبوک پاڼې په خپره شوې اعلامیه کې ویل شوي چې پر دغه پلاوي د یو شمېر اړخونو له لوري نیوکې شوي چې د درک وړ دي خو مرکچي پلاوی به د افغانستان اسلامي جمهوریت او د هېواد د ملي ګټو استازیتوب کوي؛ که څه هم د دغه ټیم له خوا د راپور ورکولو او دوی ته د صلاحیتونو ورکولو په تړاو لا نورو بحثونو ته اړتیا شته.
اعلامیه دغه راز زیاتوي چې د سیاسي بحران هوارۍ لپاره د منلو وړ حل لاره نه ده رامنځته شوې ده، خو تلپاتې، عادلانه او با عزته سوله د افغانستان د خلکو لومړیتوب دی او د سولې مسله به د نورو اختلافي ټکو تر سیوري لاندې رانه شي.
د سولې د مرکچې پلاوي ملاتړ مهال تود شو چې طالبانو دغه پلاوی رد کړ او ویې ویل چې دغه پلاوی د دولت له خوا اعلان شوی دی.
