د روښنايي غورځنګ د رهبرۍ غړي داود ناجي وویل، چې د دې لاریون د امنیت مسوولیت د حکومت پر غاړی دی.
د دې غورځنګ غړیو د ملګرو ملتونو له سیاسي نمایندګۍ او د غوڅ ماموریت له ځواکونو وغوښتل چې د لاریونوالو د امنیت په اړه پر حکومت فشار راوړي او د خپل نړیوال ماموریت چې د ډیموکراسۍ ملاتړ، بشر حقونه او د بیان ازادي ده؛ ترسره کړي.
د روښنايي غورځنګ د خلکو شورا د یوې خبرپاڼې په اورولو سره وايي، که چېرې راتلونکی لاریون د پيولیسو او امنیتي ځواکونو له خوا له تاوتریخوالي سره مخ شي؛ دوی ته به د زغم وړ نه وي او ډېرې بدې پایلې به ولري.
په ورته وخت کې د کابل امنیې قوماندانۍ ویاند بصیر مجاهد سلام وطندار ته وویل، که چېرې لاریون د مدني حرکت په شان وشي؛ د پولیسو له خوا به ورسره د قانون په چوکاټ کې مرسته وشي.
د روښنايي غورځنګ د خلکو شورا د تلې ۶مه د روښنایي غورځنګ د نړیوال لاریون ورځ نومولې ده او وايي، چې هغوی د پراخو لاریونونو په توګه نړیوالې ټولنې ته وریادوي، چې دوی د یو داسې دولت اقتصادي او نظامی ملاتړ کوي، چې د یو شمېر هېوادوالو سره تبعیض کوي او د هغوی سوله ییز لاریون په تاوتریخوالي اړوي.
د روښنايي غورځنګ د خلکو شورا د مدني فعالانو د وړاندیزونو او یونما د منځګړيتوب پر بنسټ د حکومت او دې شورا ترمنځ د روغې جوړې په اړه د خبرو هرکلی کوي.
